Turǵyn úıdi elektr jelilermen jabdyqtaý kezinde aqsha jymqyrǵan sheneýnikter sottaldy
ASTANA. KAZINFORM — Byltyr prokýratýra 2,5 myńnan astam buzýshylyqty anyqtap, 1,4 myń qadaǵalaý aktisi engizgen. Bul týraly QR Bas prokýratýranyń baspasóz qyzmeti málimdedi.
Prokýratýra organdary memlekettik bıýdjettiń tórtten birinen astamy jumsalatyn memlekettik satyp alý salasynda turaqty monıtorıng jasap otyrady. Ol úshin jańa tásilder ázirlenip, aqparattyq-analıtıkalyq júıeler belsendi qoldanylady.
«2023 jyly josparlaýdan bastap taýarlar, jumystar men qyzmetterdi qabyldaýǵa deıingi kezeńderde barlyǵy 2,5 myńnan astam buzýshylyq anyqtaldy. Olar boıynsha 1,4 myń qadaǵalaý aktisi engizildi. Qabyldanǵan sharalarmen memleket kirisine 10 mlrd teńge óndirildi» — delingen habarlamada.
Mysaly, Jambyl oblysynyń Taraz qalasynda jylý magıstralin rekonstrýktsııalaý konkýrsy boıynsha áleýetti ónim berýshilerge negizsiz talaptar belgilengeni anyqtaldy.
Aqmola oblysynda jekelegen aýdandyq ákimdikter jobalyq smetalyq qujattamany ázirlemeı bloktyq-modýldik qazandyqtardy satyp alýǵa nıetti. Zańsyz konkýrstardyń kúshi joıylyp, zańnama talaptaryna sáıkes ótkizildi.
«Osy oblysta arnaıy prokýrorlar «Jaılaý Sıtı» turǵyn úı qurylys kooperatıvi jáne «Quryltaı» kóppáterli turǵyn úı keshenin syrtqy elektrmen jabdyqtaý jelilerin salý kezinde bıýdjet qarajatyn jymqyrý faktisi boıynsha qylmystyq isti tergedi. 2023 jyly 30 qazanda Tselınograd aýdany qurylys bóliminiń basshysy S. jáne «Eńbek-Arshaly» ShJQ RMK dırektory A. 7 jáne 8 jylǵa tıisinshe bas bostandyǵynan aıyryldy, al «Astana ElektroStroıKomplekt» JShS dırektory S. 7 jylǵa shartty túrde sottaldy» - dep habarlady prokýratýra.
Atalǵan salada júıeli problemalardy anyqtaý maqsatynda ótken jyldyń sońynda Qarjy mınıstrligi jáne jergilikti atqarýshy organdarda tekserýler júrgizilgen. Memlekettik satyp alý týraly zańnamanyń normalaryn ekiushty qoldaný, ishki memlekettik aýdıt organdarynyń aktilerine qarsylyqtardy uzaq qaraý jáne basqa da buzýshylyqtar faktileri anyqtaldy. Qorytyndy boıynsha Úkimetke usynys engizildi.
Qadaǵalaý aktisi boıynsha memlekettik satyp alý júıesin jaqsartý, onyń ishinde zańnamany jetildirý jolymen is-sharalar kózdelgen Jol kartasy ázirlendi.
Sonymen qatar, Bas prokýratýra «Memlekettik satyp alý týraly» jańa Zańdy jáne oǵan qatysty zańǵa táýeldi aktilerdi ázirleýge qatysady. Memlekettik qarajatty jumsaýdyń zańdylyǵyn qamtamasyz etý salasyndaǵy jumys jalǵasyp jatyr ári erekshe baqylaýǵa alyndy.
