Turǵyn úı tapshylyǵy: Tarazda páter kezegi qurylys qarqynynan ozyp tur

TARAZ. KAZINFORM — Bıyl Tarazda biraz azamattyń baspanaly bolǵanyna qaramastan, turǵyn úı kezeginde turǵandar sany 6 744 adamǵa artty, dep habarlaıdy Kazinform tilshisi.

Qazirgi ýaqytta Taraz qalasynda turǵyn úı alý úshin kezekke 30 468 adam tirkelgen. Al ótken jyly kezekte 23 724 adam bolǵan. Salystyrý úshin aıtsaq, byltyr ósim bar bolǵany 864 adamdy quraǵan (2023 jyly kezekte 22 860 adam turǵan).

Qala basshylyǵy da bul jaǵdaıdyń ózekti áleýmettik máselelerdiń biri ekenin jasyrmaıdy. Osyǵan baılanysty qalada turǵyn úı máselesin sheshý maqsatynda aýqymdy qurylys jumystary júrgizilip jatyr.

– Bıyl qala aýmaǵynda bıýdjet qarajaty esebinen 48 kópqabatty turǵyn úıdiń qurylysy júrip jatyr, – deıdi Taraz qalasynyń ákimi Baqytjan Orynbekov.

Kópqabatty úılermen qatar jeke sektorda da turǵyn úıler salynyp jatyr. Atap aıtsaq, «Shapaǵat» shaǵynaýdanynda 16 úıdiń qurylysy júrgizilip, onyń 12-si paıdalanýǵa berilgen. Qalǵan tórteýin jyl sońyna deıin aıaqtaý josparlanyp otyr eken. Al «Uly dala» shaǵynaýdanynda 22 úı salynyp jatyr, olardyń 10-y paıdalanýǵa qabyldanypty. «Balaýsa» shaǵynaýdanynda 22 kópqabatty turǵyn úıdiń qurylysy áli aıaqtalmaǵan.

Sonymen qatar jergilikti atqarýshy organdar ótken jyly áleýmettik jaǵynan osal toptar úshin 9,9 mlrd teńgege 669 páter satyp alynǵan. Al bıyl osy maqsatqa 3,8 mlrd teńge bólinip, qazirgi tańda 228 páter satyp alyndy. Jyl sońyna deıin taǵy 32 páterdi satyp alý josparlanyp otyr eken.

Alaıda turǵyn úı salasynda osynshama jumys atqarylyp jatsa da, bul baspana tapshylyǵyn azaıtar emes. Ákimdik málimetine súıensek, turǵyn úı máselesi kezeń-kezeńimen sheshilip jatqanymen, turǵyn úı kezegine turýshylar sany jańa turǵyn úılerdiń paıdalanýǵa berilý qarqynynan áli de asyp túsip otyr.

Aıta ketsek, Taraz turǵynynyń úı alý kezegi sot arqyly qalpyna keltirilgenin jazǵanbyz.

Sonymen qatar Taraz turǵyndary jańa kópir salynatyn aýmaqtaǵy úıleri men kásiporyndaryn buzýǵa ruqsat bermeı otyr.