Turǵyn úı, shıpajaı, salyq jeńildigi: soǵys jáne tyl ardagerlerine qandaı kómek kórsetiledi

ASTANA. KAZINFORM — Ekinshi dúnıejúzilik soǵys jeńisiniń 80 jyldyǵy qarsańynda soǵys jáne tyl ardagerlerin qoldaý baǵytynda birqatar is-shara josparlanyp otyr. Tolyǵyraq Eńbek jáne halyqty áleýmettik qorǵaý vıtse-mınıstri Oljas Anafın aıtyp berdi.

— Biz soǵys ardagerlerimen qatar, tyl eńbekkerleri men Jeńiske úles qosqan basqa da sanattaǵy azamattarǵa keminde 50 myń teńge kóleminde birjolǵy tólem jasaýdy usyndyq. Sondaı-aq, josparǵa sáıkes, ekinshi dúnıejúzilik soǵys jáne tyl eńbekkerleriniń densaýlyǵyn jaqsartyp, ómir sapasyn arttyrý maqsatynda shıpajaıda emdeýmen qamtamasyz etý is-sharalary kózdelgen. Odan bólek, mereke qarsańynda barlyq óńirde jalǵyz turatyn soǵys jáne tyl ardagerlerine ataýly áleýmettik kómek, azyq-túlik sebetterin tabystaý uıymdastyrylady. Atalǵan sharalar boıynsha jergilikti atqarýshy organdarǵa tıisti usynymdar joldandy, — dedi Oljas Anafın elordada ótken ardagerler keńesiniń respýblıkalyq plenýmynda.

Vıtse-mınıstr keltirgen málimetterge súıensek, joǵaryda atalǵan qoldaý sharalarymen qatar keıbir óńirde jergilikti bıýdjet qarajaty esebinen birqatar shara qarastyrylǵan:

— kommýnaldyq qyzmet aqysyn óteý;

— shıpajaıda emdelýge joldama:

— qoǵamdyq kólik aqysyna jeńildik.

Oǵan qosa, qoldanystaǵy zańnamaǵa sáıkes, soǵys ardagerlerine:

— salyq jeńildikteri;

— emhanalarda basym qyzmet kórsetý jáne kezekten tys aýrýhanaǵa jatqyzý;

— Astana jáne Almaty qalasynda arnaıy gospıtaldarda bilikti medıtsınalyq kómek kórsetý;

— Turǵyn úı zańnamasyna sáıkes, soǵys ardagerlerine turǵyn úı birinshi kezekte beriledi.

Buǵan deıin habarlaǵanymyzdaı, bıyl Jeńistiń 80 jyldyǵyna oraı soǵys ardagerlerine 5 mln teńge kóleminde birjolǵy tólem beriledi. Búginde bes óńirde soǵys ardagerlerine tólem jasaldy. 

Aıta keteıik, bıyl 1 sáýirdegi jaǵdaı boıynsha elimizde ekinshi dúnıejúzilik soǵysynyń 111 ardageri bar. 

Bıyl Uly Jeńistiń 80 jyldyǵyna oraı el aýmaǵynda eki myńdaı is-shara ótedi.

Sondaı-aq Uly Jeńistiń 80 jyldyǵyna oraı elordada ótetin áskerı sherý barlyq respýblıkalyq telearna men LED ekrandardan tikeleı kórsetiledi. 

Búgin elordada «Ardagerler uıymy» respýblıkalyq qoǵamdyq birlestigi ortalyq keńesiniń III plenýmy ótti.