Turǵyn úı satyp alý-satý boıynsha keıingi úsh jyldaǵy eń joǵary kórsetkish tirkeldi
ASTANA. KAZINFORM - 2025 jylǵy jeltoqsan aıynda turǵyn úıdi alyp-satý boıynsha sońǵy úsh jyldaǵy eń joǵary kórsetkish tirkelip, ol 53 128 mámilege jetti, dep habarlaıdy Ulttyq statıstıka bıýrosy.
Bıýro málimetterine qaraǵanda, qarasha aıymen salystyrǵanda jeltoqsanda mámileler sany 32,9% artqan, mámileler sanynyń ósimi elimizdiń barlyq óńirinde baıqaldy. Eń joǵary ósim Mańǵystaý (+69,2%), Pavlodar (+66,3%) jáne Aqtóbe (+53,6%) oblystarynda.
Kóppáterli úılerdegi turǵyn úı mámileler sany 31,9% (9 955 mámilege) ósken. 2025 jyldyń jeltoqsan aıynda páterler boıynsha barlyǵy 41 177 mámile jasaldy, bul mámilelerdiń jalpy sanynyń 77,5%-y. Bólmeler sany boıynsha 1 bólmeli páterler satylymy basym bolǵan, 2025 jyldyń jeltoqsan aıynda olar boıynsha 15 323 mámile resimdelgen.
Jeke turǵyn úıler boıynsha mámileler sany 36,6% (3 200 mámilege) ósken. Jeltoqsanda barlyǵy 11 951 mámile tirkelgen. Jeke turǵyn úıler boıynsha mámileler sanynyń ósýi elimizdiń Pavlodar oblysynan basqa barlyq óńirde baıqaldy. Eń joǵary ósim Mańǵystaý (+83,9%), Aqtóbe (+76,6%) jáne Batys Qazaqstan (+52,8%) oblystarynda tirkelgen.
Osyǵan deıin Qazaqstanda 2026 jyly turǵyn úı baǵasy qalaı ózgeredi degen taqyrypta mamandar pikirin bilgen edik.
