Turǵyn úı salýshylarǵa QQS boıynsha jeńildik bolmaıdy — mınıstrlik

ASTANA. KAZINFORM — Jańa Salyq kodeksiniń jobasyn talqylaý barysynda qurylys salýshylardy turǵyn úı satý kezindegi QQS-ten bosatý jeńildigin joıý týraly usynys engizildi. Bul týraly Parlamenti Májilisi janyndaǵy Qoǵamdyq palata otyrysynda Ulttyq ekonomıka birinshi vıtse-mınıstri Azamat Amrın málim etti.

— Qurylys salýshylar turǵyn úıdi satqan kezde QQS bosatýdyń qoldanystaǵy rejımin saqtaý máselesi kóterildi. Biz bul máseleni ári qosymsha talqyladyq. Bizdińshe, qazirgi jeńildikter turǵyn úı qunynyń tómendeýine áser etpeı otyr. Shyn máninde, qurylys salýshynyń marjasyn arttyrýǵa yqpal etken. Dınamıkaǵa qaraıtyn bolsaq, bizde qurylys materıaldary baǵasynyń ósimi 106%, al turǵyn úı baǵasynyń ósý dınamıkasy 116%, — dedi Azamat Amrın. 

Eske salsaq, 9 sáýir kúni Parlament Májilisi Salyq kodeksiniń jańa jobasyn birinshi oqylymda maquldady. Endi palata osy qujat jobasy aıasynda usynylǵan qosymsha bastamalardy ekinshi oqylymǵa deıin talqylaıdy.