Turǵyn úı qurylysyna «eskroý-shottar» uǵymy engizile me – Ónerkásip mınıstrliginiń jaýaby
ASTANA. KAZINFORM – Ónerkásip jáne qurylys mınıstrligi Májilis depýtattarynyń turǵyn úı qurylysyna «eskroý-shottar» uǵymyn engizý usynysyna qatysty saýalyna jaýap berdi,
«Tólemder jáne tólem júıeleri týraly» 2016 jylǵy 26 shildedegi № 11-VI Qazaqstan Respýblıkasynyń Zańyna sáıkes, eskroý-shot – klıent aıqyndaǵan sharttardyń bastalýyna nemese oryndalýyna deıin banktik shot boıynsha shyǵys operatsııalaryn jasaýǵa úshinshi tulǵanyń quqyǵyn shekteı otyryp, klıent osy tulǵanyń atyna ashatyn aǵymdaǵy shot nemese jınaq shoty. Sonymen qatar, «eskroý-shottar» tetigin engizý múddeli memlekettik organdarmen egjeı-tegjeıli pysyqtaýdy talap etetindikten, mınıstrlik Ulttyq banki, Qarjy naryǵyn retteý jáne damytý agenttigi men Qarjy mınıstrligine óz ustanymdaryn berý týraly hat joldady», - delingen Ónerkásip jáne qurylys mınıstriniń mindetin atqarýshy Iran Sharhannyń jaýabynda.
Sondaı-aq, ol atalǵan tetikti engizý úshin Qazaqstannyń birqatar zańnamasyna, onyń ishinde Azamattyq kodekske ózgeristerdi engizý qajet ekenin atap ótedi.
«Bul rette, «eskroý-shottardy» paıdalaný turǵyn úı qurylysy naryǵyna tikeleı áser etedi jáne keıinnen bastapqy naryqta jyljymaıtyn múlik baǵasynyń ósý táýekelderi bolýy múmkin. Bul úlestik qurylystyń ınvestıtsııalyq tartymdylyǵyn aıtarlyqtaı tómendetedi jáne satyp alý qabiletine teris áser etedi. Osyǵan baılanysty, mınıstrlik «eskroý-shottardy» engizý máselesi egjeıtegjeıli pysyqtaýdy jáne múddeli memlekettik organdar tarapynan jan-jaqty qaraýdy talap etedi dep sanaıdy», - dedi ol.
