Turǵyn úı-kommýnaldyq sharýashylyqta biryńǵaı tsıfrlyq júıe usynyldy

ASTANA. KAZINFORM — Qazaqstanda turǵyn úı-kommýnaldyq sharýashylyq salasynda derekterdi ortalyqtandyrýǵa jáne jasandy ıntellektini engizýge baǵyttalǵan tsıfrlyq ekojúıe qalyptastyrý usynyldy. Bul týraly TKSh Qazortalyǵy janyndaǵy taldaý jáne turaqty damý qyzmetiniń basshysy, Qoǵamdyq keńestiń hatshysy Gúlvıra Ábetova málimdedi. 

Onyń aıtýynsha, bastama jobalyq sıpatqa ıe jáne qazirgi tańda tanystyrý formatynda usynylyp otyr.

— Bizdiń negizgi maqsatymyz turǵyn úı-kommýnaldyq sharýashylyq salasyna qatysty barlyq derekti bir ortalyqqa shoǵyrlandyrý, jobalardy iske asyrýda biryńǵaı standart qalyptastyrý jáne jasandy ıntellektini engizýge negiz bolatyn bilim bazasyn qurý, — dedi Gúlvıra Ábetova.

Spıkerdiń sózinshe, búginde salada 700-den astam aqparattyq júıe bar, alaıda derekterdiń ózara úılespeýi saldarynan tıimdi analıtıka jasaý qıynǵa soǵyp otyr.

— Derekter neǵurlym tolyq ári ózekti bolsa, qarjylyq josparlaý, tarıf qalyptastyrý jáne memlekettik baǵdarlamalardy iske asyrý da soǵurlym naqty ári tıimdi bolady, — dep atap ótti ol.

Usynylyp otyrǵan júıe elektr energııasy, jylýmen jáne sýmen jabdyqtaý, káriz, gaz, sondaı-aq PIK, MIB jáne basqarýshy kompanııalardyń qyzmetine qatysty derekterdi biriktirýdi kózdeıdi. Bul basqarýshylyq sheshimder qabyldaýda adamı faktordy azaıtyp, memlekettik organdardyń júktemesin qysqartýǵa múmkindik beredi.

— Barlyq sýbektiler júıege óz esepterin, smetalaryn, tarıfteri men kelisimsharttaryn engizse, turǵyndar tarapynan qarajattyń qalaı jáne qaıda jumsalatyny jónindegi suraqtar azaıady, — dedi Qoǵamdyq keńestiń hatshysy.

Aıta keteıik, kommýnaldyq sektorǵa ártúrli qarjy kózderinen 1,9 trıllıon teńge tartylady.