Turǵyn úı-kommýnaldyq sharýashylyǵyn jańǵyrtý baspana baǵasyna áser ete me
ASTANA. KAZINFORM — Ulttyq joba aıasynda turǵyn úı-kommýnaldyq sharýashylyq salasyn jańǵyrtýǵa 13 trln teńge bólinedi. Osy oraıda turǵyn úı baǵasy ósýi múmkin be?
Bul saýalǵa Ónerkásip jáne qurylys vıtse-mınıstri Qýandyq Qajkenov Úkimet úıinde ótken baspasóz máslıhatynda jaýap berdi.
Vıtse-mınıstrdiń aıtýynsha, 2023 jyldan bastap elde arhıtektýralyq, qala qurylysy jáne qurylys katalogy bar. Oǵan elde jasalyp, óndiriletin barlyq materıal men qural-jabdyq Baǵa qalyptastyrý ortalyǵy men memlekettik ǵylymı-zertteý jáne jobalaý ınstıtýty arqyly engiziledi.
Katalogqa kez kelgen óndirýshi óz ónimderi týraly derekti, onyń baǵasy men quramyn engizedi. Sodan soń materıaldar men qural-jabdyq týraly derek jobalaý-smetalyq qujatqa engiziledi, sol boıynsha joba iske asyrylady jáne qurylys-montaj jumysy júrgiziledi.
— Osylaısha, baǵa saıasaty júıeli túrde retteledi jáne kúrt ózgeris kútilmeıdi, — dep sendirip otyr Ónerkásip jáne qurylys mınıstriniń orynbasary.
Eske sala ketsek, 2025 jylǵy 25 shildede Prezıdent kóppáterli turǵyn úılerdi basqarý júıesin jetildirýge baǵyttalǵan qujatqa qol qoıdy.
Artynsha atalǵan zań aıasynda elimizdiń energetıka jáne kommýnaldyq sektordy jańǵyrtýdyń aýqymdy josparyna sholý jasaǵan edik.
Aıta ketsek, turǵyn úı-kommýnaldyq sharýashylyǵy salasyn jetildirýge arnalǵan ulttyq jobada otandyq taýar óndirýshilerge basymdyq beriledi.