Turǵyn-úı kommýnaldyq sharýashylyǵyn qarjylandyrý baǵdarlamasy ázirlendi
ASTANA. KAZINFORM — Aldaǵy 5 jylǵa arnalǵan Turǵyn-úı kommýnaldyq sharýashylyǵyn qarjylandyrý baǵdarlamasy ázirlendi.
Bul týraly Úkimet otyrysynda Memleket basshysynyń Joldaýyn iske asyrý jónindegi jalpyulttyq is-sharalar josparynyń jobasyn tanystyrǵan Premer-Mınıstrdiń orynbasary — Ulttyq ekonomıka mınıstri Nurlan Baıbazarov aıtty.
«Energetıka sektorynda jáne kommýnaldyq sharýashylyqta tıisti Ulttyq joba qabyldanady. Investıtsııalyq tartymdylyqty arttyrý úshin ınvestıtsııalardy aqylǵa qonymdy merzimde qaıtarýdy qamtamasyz etýge múmkindik beretin tarıftik ádisnama qaıta qaralatyn bolady. Sonymen qatar, ınjenerlik kommýnaldyq jelilerdi salý jáne jańǵyrtý úshin qaryzǵa qarajat tartý maqsatynda 2024-2029 jyldarǵa arnalǵan turǵyn-úı kommýnaldyq sharýashylyǵyn qarjylandyrý baǵdarlamasy ázirlendi», — dedi ol.
Mınıstrdiń sózine qaraǵanda, baǵdarlama bıýdjet qarajatyn únemdeýge jáne turǵyn-úı kommýnaldyq sharýashylyǵy salasyndaǵy jobalardy qarjylandyrý kózderin keńeıtýge múmkindik beredi.
«Sonymen birge, jyl sońyna deıin kommýnaldyq qyzmetterdi tutynýdyń „kóp tutynsań — kóp tóleısiń“ qaǵıdaty boıynsha bekitilgen áleýmettik normalaryn aýqymdy qoldaný kózdelýde. Kommýnaldyq qyzmetterge aqy tóleý boıynsha halyqtyń áleýmettik osal toptarynyń múddelerin qorǵaý máseleleri pysyqtalatyn bolady. Osylaısha, salalyq zańǵa áleýmettik mańyzy bar qyzmetter jáne olardy memlekettik kórsetiletin qyzmetter protsesterine uqsas reglamentteý uǵymy engiziledi. Kólik-logıstıka salasynda taıaýdaǵy 3 jylda rentabeldilik deńgeıge deıin júkterdi temir jolmen tasymaldaýǵa retteletin tarıfter bekitiledi», — dedi Nurlan Baıbazarov.
