Turǵyn úı kesheniniń aýlasyna kólik qoıýǵa bola ma — ІІM jaýaby
ASTANA. KAZINFORM — Jańa turǵyn úı keshenderinde stılobatqa (jer asty parkınginiń ústindegi aýla) kólik qoıýǵa bola ma degen suraq jıi týyndaıdy. Mundaı jerde kólik qaldyrýǵa qaı kezde ruqsat etiledi, al qandaı jaǵdaıda bul talap buzý bolyp sanalady? Osyny anyqtaý úshin Kazinform agenttigi QR Іshki ister mınıstrligine resmı saýal joldady.
Mınıstrliktiń málimetinshe, Jol júrisi qaǵıdalarynda «stılobat» uǵymy joq. Sondyqtan mundaı aýmaqtarǵa jalpy talaptar qoldanylady. Bul rette negizgi ólshem — stılobattyń bastapqy jobada kólik qozǵalysy men turaqqa arnalǵan oryn retinde kózdelýi.
— Eger stılobat jobalaý qujattarynda kólik qozǵalysy men avtoturaqqa arnalǵan aýmaq retinde belgilenip, qaýipsizdik talaptaryna saı bolsa, onda kólik qoıýǵa ruqsat etiledi, — delingen mınıstrlik jaýabynda.
Mınıstrliktiń túsindirýinshe, stılobatta bos orynnyń bolýy ony avtoturaq retinde paıdalanýǵa bolady degendi bildirmeıdi. Mundaı múmkindik turǵyn úı keshenin jobalaý kezeńinde-aq qarastyrylýy tıis.
Stılobatqa qashan kólik qoıýǵa bolady?
Mınıstrliktiń málimetinshe, mynadaı talaptar saqtalsa, avtokólik qoıýǵa ruqsat etiledi:
• turǵyn úıdiń jobasynda kólik júretin joldar men avtoturaq oryndary kózdelse;
• konstrýktsııasy avtokólik túsiretin salmaqqa eseptelse;
• nysan kólik qozǵalysy eskerilip paıdalanýǵa berilse jáne qajetti jol belgileri men jol tańbalarymen jabdyqtalsa.
Stılobatty avtoturaq retinde paıdalanýǵa bola ma, joq pa degen másele turǵyndardyń nemese basqarýshy kompanııanyń qalaýyna emes, nysannyń qalaı jobalanǵanyna jáne qalaı paıdalanýǵa berilgenine baılanysty.
Qandaı jaǵdaıda kólik qoıýǵa bolmaıdy?
Eger stılobat tek parkıngtiń tóbesi bolyp, keıin aýla retinde abattandyrylsa, onda mundaı jerge kólik qoıýǵa bolmaıdy.
ІІM málimetinshe, mynadaı jaǵdaılarda kólik qoıýǵa ruqsat etilmeıdi:
• stılobatta balalar nemese sport alańdary ornalasyp, joba boıynsha kólik qozǵalysy kózdelmese;
• jaıaý júrginshiler aımaǵy men kólik júretin bóliktiń arasy qaýipsiz bólinbese.
Sonymen qatar mınıstrlik múlik ıeleri birlestigi nemese basqarýshy kompanııa bekitilgen jobada kózdelmese, óz betinshe jańa avtoturaq oryndaryn uıymdastyra almaıtynyn, jol tańbasyn túsire almaıtynyn jáne aýmaqtyń maqsatyn ózgertýge quqyǵy joq ekenin atap ótti.
Ereje buzǵandarǵa qandaı jaýapkershilik qarastyrylǵan?
ІІM aýlalarda basymdyq jaıaý júrginshilerge, ásirese balalarǵa beriletinin eske saldy. Sondaı-aq kólikter adamdardyń júrip-turýyna kedergi keltirmeýi jáne jedel járdem men órt sóndirý tehnıkalarynyń júrýine bóget jasamaýy tıis.
Belgilenbegen jerge kólik qoıǵany úshin Qazaqstan Respýblıkasynyń Ákimshilik quqyq buzýshylyq týraly kodeksiniń 597-babyna sáıkes jaýapkershilik kózdelgen. Bul bap kólik quraldaryn toqtatý nemese qoıý qaǵıdalaryn buzǵandarǵa qoldanylady.
Eske salaıyq, Almatyda jyl basynan beri kólik qoıý erejesin buzýdyń 15 myń deregi anyqtalǵan.
