Turǵyn sany 50-den aspaıtyn 122 aýyl FWA tehnologııasy arqyly ınternetke qosylady

ASTANA. KAZINFORM — «Qazaqtelekom» aktsıonerlik qoǵamynyń basqarma tóraǵasy Baǵdat Mýsın Úkimet otyrysynda shalǵaıda jatqan shaǵyn aýyldar ınternetpen qalaı qamtylatynyn aıtty. 

— «Aýyl online» jobasy aıasynda elimizde buryn bolmaǵan 3 myńnan astam aýyldy jyldamdyǵy joǵary ınternetke qosý bastalyp ketti. Bul joba Jasandy ıntellekt mınıstrliginiń kómegimen jasalyp jatyr. 1,5 jyldyń ishinde 500-den astam eldi meken Amazon, Starlink sııaqty jer serikteri arqyly qosylatyn bolsa, 2500 aýylǵa optıka tartylady. Joba aıasynda 5000-nan astam mektep, densaýlyq saqtaý nysandary, memlekettik mekeme jelige qosylady. Eń bastysy, 1 mıllıonnan astam aýyl turǵyny jyldamdyǵy joǵary ınternetke qol jetkizedi, — dedi ol.

Kompanııa basshysy kólik aıaǵy jete bermeıtin aýyldardy ınternetpen qamtý jumystary bastalǵanyn atap ótti.

— Jetý qıyn shalǵaı aýyldardy ınternetpen qamtý úshin Fixed Wireless Access tehnologııasy da engizilip jatyr. Qazir 22 aýyl ınternetke qosylǵan bolsa, 2026 jyldyń aıaǵynda deıin osyndaı 122 shalǵaı aýyldaǵy 11 myń abonentti osy tásilmen ınternetke qosý kózdelgen. Bul halyq sany 50 turǵyn shamasyndaǵy shalǵaı jatqan shaǵyn aýyldarǵa arnalady, — dedi Baǵdat Mýsın.

Aıta ketý kerek, Úkimettiń búgingi otyrysynda jylytý maýsymyndaǵy órt qaýipsizdigi sharalary pysyqtalyp jatyr.