Turǵylyqty jerin aýystyrǵan azamattarǵa zeınetaqy tóleý júıesi ózgeredi

ASTANA. KAZINFORM — Qazaqstanda qos azamattyǵy bar jáne turǵylyqty jerin aýystyrǵan azamattarǵa zeınetaqy tóleýdiń jańa júıesi týraly Eńbek jáne halyqty áleýmettik qorǵaý mınıstri Svetlana Jaqypova túsindirip berdi. 

— Turǵylyqty jerin aýystyrǵan azamattarǵa zeınetaqy tóleýdi ýaqytsha toqtatý máselesin qoǵammen talqylaımyz. Normatıvtik-quqyqtyq aktilerdi ázirleý talaptaryna sáıkes, qujat «Ashyq NQA»-ǵa ornalastyryldy, qoǵammen talqylap baryp sheshim qabyldaý úshin. Búginde keıbir zeınetkerlerdiń Qazaqstan aýmaǵynda turmaı, ekinshi azamattyǵy bola tura elden tysqary ketken faktilerin anyqtadyq. Sondyqtan qazir qatańdatý tek zeınetkerlerge ǵana emes, jalpy turǵylyqty jeri boıynsha tirkeý talaptaryna qatysty júrgizilip jatyr, — dedi Svetlana Jaqypova BAQ ókilderiniń saýalyna jaýap bere turyp.

Mınıstrdiń aıtýynsha, eger zeınetkerdiń qos azamattyǵy bolmasa jáne basqa elden zeınetaqy almaıtyny anyqtalsa, onda zeınetaqy tólemi qaıta qalpyna keltiriledi.

— Qabyldap jatqan norma qazaqstandyqtardyń quqyǵyn shektemeıdi. Baıqaǵan bolsańyzdar, qabyldanyp jatqan sharalar áleýmettik ádilettilik qaǵıdatyn qalpyna keltirýge, adal salyq tóleýshilerdiń múddesin qorǵaýǵa baǵyttalǵan. Óıtkeni, azamattar tólegen jeke tabys salyǵynyń qalaı, qaıda jumsalyp jatqany mańyzdy, — deıdi ol.

Buǵan deıin elimizde sottalǵan zeınetkerlerge túrmedegi ýaqytynda zeınetaqy tólenbeýi múmkindigi týraly habarlaǵan edik. 

Aıta keteıik, 2026 jyly zeınetaqy 10 paıyz ósedi.