Túrgende 30 myń halyq turatyn aýyldarǵa sel qaýpi tónip tur
ALMATY. KAZINFORM — Almaty oblysynyń aýmaǵyndaǵy Túrgen ózeniniń basseıninde kúrdeli sel jaǵdaıy baıqalyp otyr.
Qaýip-qater aımaǵynda 30 myńnan astam adam turatyn Taýtúrgen, Túrgen, Qarakemer, Baltabaı eldi mekenderi bar.
Osyǵan baılanysty muzdyqtyń jáne Túrgen ózeni basseıniniń sel jáne gıdrometeorologııalyq jaǵdaıyna monıtorıng jasaldy.
— Bul aımaqqa barýǵa ýaqytsha tyıym salynǵan. Jaıaý týrısterdi, avtokólik ıelerin, jergilikti turǵyndar men atqarýshy organdardy habardar etý boıynsha jumys júrip jatyr. Tótenshe jaǵdaıdyń aldyn alý úshin barlyq múmkin sharalar qabyldanýda, — dep habarlady TJM.
Jaqynda TJ vıtse-mınıstri Batyrbek Ábdishevtiń úılestirýimen TJM Qazavıaqutqarýdyń eki tikushaǵy muzdaq kóldiń mańynda jabdyqtardy tasymaldap túsirý jumysyn júzege asyrdy. Bul isti «Qazseldenqorǵaý» MM basshylyǵy men avarııalyq brıgadasy júrgizdi.
Eki kún ishinde olar sıfon tóseý arqyly erigen muzdyq sýyn aıdaý jumysyn da júrgizdi.
Osylaısha búgin uzyndyǵy 300-ge jýyq metr, ónimdiligi sekýndyna 110 lıtr bolatyn alǵashqy sıfon tizbegi iske qosyldy.
Kóldegi jumys aýa raıyna baılanysty jalǵasa beredi (shamamen 16 shildege deıin).
Aıta keteıik, júrgizilip jatqan jedel jumystar adam ómirine jáne obektilerdiń qıraýyna qaýip tóndiretin sel tasqynyna qarsy baǵyttalǵan.
Daıyndyq jumystary Almaty oblysy ákimdiginiń qoldaýymen uıymdastyryldy.
