Túrgen shatqalyndaǵy tasqynnan keıin qalpyna keltirý jumystary júrip jatyr
ASTANA. KAZINFORM — Almaty oblysynyń Eńbekshiqazaq aýdanynda nóser jaýyn-shashynnyń saldaryn joıý jumystary táýlik boıy úzdiksiz júrgizilýde. Jaǵdaı TJM turaqty baqylaýynda. Bul týraly vedomstvonyń baspasóz qyzmeti málim etti.
— Tótenshe jaǵdaı týyndaǵan sátten bastap oqıǵa ornynda jedel shtab qurylyp, onyń jumysyn Almaty oblysy TJD bastyǵy, azamattyq qorǵaý polkovnıgi Daýren Orazbekov úılestirýde. Sý tasqyny saldaryn joıý jumystaryna Almaty oblysy TJD, QR TJM «Qazseldenqorǵaý» jáne jergilikti atqarýshy organdardyń kúshteri men quraldary jumyldyrylǵan, — dep habarlady mınıstrlikten.
Qazirgi ýaqytta arnaıy tehnıkanyń kómegimen apattyq-qalpyna keltirý jumystary, zaqymdanǵan avtomobıl jolyn tazartý jáne kólik qatynasyn qalpyna keltirý jumystary jalǵasýda. TJM kúshterimen 42 adam, onyń ishinde 3 bala jáne 8 shetel azamaty evakýatsııalandy. Zardap shekkender joq.
Eske sala keteıik, búgin Almaty oblysynyń Qarasaı aýdanynda tótenshe jaǵdaı jarııalandy.
