Túrgen – Assy jolyn sý shaıyp, qutqarýshylar 58 adamdy evakýatsııalady
ASTANA. KAZINFORM – Nóser jaýyn-shashyn saldarynan Túrgen shatqalyndaǵy Túrgen ózeninde sý deńgeıi kúrt kóterilip, sonyń saldarynan Túrgen-Assy avtojolynyń jekelegen ýchaskelerin sý shaıyp ketti.
Sý basqan aımaqta 17 kıiz úı ornalasqan. Sonymen qatar, «Vodnık» baý-baqsha seriktestigindegi tórt aýla aýmaǵyn sý basty.
— Qaýipsizdikti qamtamasyz etý maqsatynda TJM qutqarýshylary 58 adamdy, onyń ishinde 21 balany jáne 8 shetel azamatyn evakýatsııalady, — delingen mınıstrlik habarlamasynda.
Evakýatsııalanǵan azamattar úshin TJM-niń vahtalyq kóligi uıymdastyryldy. Zardap shekkender joq.
Oqıǵa ornynda qutqarýshylar táýlik boıy jumys istep jatyr, sel qaýpi bar jaǵdaıǵa monıtorıng júrgizilip, avarııalyq-qalpyna keltirý jumystary atqarylýda. Jaǵdaı TJM-niń turaqty baqylaýynda.
Saldardy joıý jumystaryna jalpy TJM, jergilikti atqarýshy organdar jáne ózara is-qımyl jasaıtyn qyzmetterdiń 300-ge jýyq jeke quramy men 44 tehnıkasy jumyldyryldy.
Aıta keteıik, Almaty oblysynda avtojol men demalys aımaqtaryn sý basqan edi.
