«Týretskıı hory» Astananyń bas sahnasynda mereıtoılyq kontsertin berdi
ASTANA. Qazannyń 29-y. QazAqparat /Gúlmıra Álıakparova/ - Reseılik «Týretskıı hory» Astananyń bas sahnasynda óziniń 20 jyldyq mereıtoıyna arnalǵan kontsert berdi.
«Qazaqstan» ortalyq kontsert zaly lyq tolǵanyna qaraǵanda «Týretskıı hory» reseılik qana emes, qazaqstandyq ónersúıer qaýymǵa da etene tanys ekendigin kórsetti.
Ústimizdegi jylǵy qyrkúıek aıynda art-top mereıtoılyq repertýarymen álem boıynsha gastrolin bastady. Onyń aıasynda ártister 100-120 kontsert berýdi kózdep otyr. Buǵan deıin olar Sibir men Volga jaǵalaýynda boldy. «Týretskıı hory» Qazaqstanda Astanadan bastaǵan gastrolin Qaraǵandy, Almaty jáne Aqtaý qalalarynda jalǵastyrady. Keıin olardy TMD-nyń basqa elderi, Eýropa, Amerıka men Taıaý shyǵys kútýde.
Hordy qurýshy jáne onyń jetekshisi Mıhaıl Týretskııdiń aıtýynsha, olar álem boıynsha jylyna 200-den astam kontsert beredi. Mereıtoılyq kontsert arnaıy baǵdarlamadan turady. Oǵan mýzykanyń sońǵy tórt jyldaǵy týyndylary endi - avangard, klassıka jáne modern.
Kontsert barysynda erlerdiń áıelder daýysymen oryndaýynda birneshe ánder shyrqaldy. «Erler áıelder daýysymen sońǵy ret 300 jyl buryn aıtty, onyń ózinde ánshilerge arnaıy hırýrgııalyq otalar jasalatyn», - deıdi M.Týretskıı.
10 adamnan quralǵan bul hor kórermenderdi áýezdi ánderimen elitip qana qoımaı, kelisimdi bılerimen de tánti etti. Onyń ishinde frantsýzdyq «kan-kan» bıi de bar. «Biz álemde bıleıtin jalǵyz hormyz», dep qaljyńdady Týretskıı.
Ártúrli janrda, ártúrli tildegi týyndylardy oryndaǵan top, qazaqstandyq kórermen úshin de arnap án daıyndaýdy umytpapty. Qazaqtyń «Aýylym» áni oryndalǵanda zalda otyrǵandardyń kóńilderi marqaıyp, shapalaqtaryn aıamady.
Top jetekshisiniń aıtýynsha, olar bul ándi alǵash Astana qalasynyń ákimi Imanǵalı Tasmaǵambetovtyń oryndaýynda estigen. Al onyń maǵynasyn tereń uǵynǵannan keıin, repertýarlaryna qosýdy uıǵarǵan.
«Týretskıı hory» 20 jyl ishinde ózderiniń biregeı úlgilerin jasap shyǵardy. Olar halyq ánderin, postkeńestik kezeńdegi jáne estradalyq ánderdi, djazdy ońaı aralastyra otyryp oryndaıdy. Bul jyldar ishinde ujymda kadrlyq ózgerister bolǵan joq.
«Qazaqstanda bizdiń kontsertterimizge keletin adamdar shanson ne bolmasa «popsa» mýzykasyn emes, bizdiń klassıkalyq, estradalyq, operalyq ánderdi mýzykalyq bir daıdjestke engizgen - biregeı formatymyzǵa qyzyǵyp keledi. Biz bes mınýtta álemdegi eń úzdik bes arııany oryndap shyǵa alamyz», - dedi ol.
