Týrbıznes ókilderi kásibı biliktiligin jetildiredi
NUR-SULTAN. QazAqparat – QR Mádenıet jáne sport mınıstrliginiń qoldaýymen «Kazakh Tourism» UK» AQ memlekettik tapsyrys aıasynda tegin trenıngter uıymdastyrady, dep habarlaıdy QazAqparat tilshisi.
Atalǵan mınıstrliktiń baspasóz qyzmeti taratqan málimetke sáıkes, elimizdiń ekskýrsııa júrgizýshi-gıdteriniń kásibı biliktiligin joǵarylatý maqsatynda ádep jáne ózin-ózi ustaý mádenıeti, toptyq psıhologııa, daǵdarys jaǵdaıynda qabyldanatyn shuǵyl sheshimder jáne basqa da týrbıznes ókilderi úshin mańyzdy taqyryptarǵa arnalǵan tegin oqytý kýrstary Almaty men Nur-Sultan qalalarynda ótedi. Biliktilikti kóterýge arnalǵan trenıngterdi qazaqstandyq jáne sheteldik mamandar, onyń ishinde Dúnıejúzilik týrıstik gıdter qaýymdastyqtary federatsııasynyń (WFTGA) mamandary júrgizedi.
«Ekskýrsııa júrgizýshi-gıdterge arnalǵan trenıngterdiń alǵashqy legi qarashanyń 17-23 kúnderi Almaty qalasynda ótkiziledi. Qazaqstandyq týroperatorlarǵa arnalǵan dárister Elordada 25-27 qarasha aralyǵynda uıymdastyrylady. Sondaı-aq, týroperatorlar men qonaqúı bıznesiniń ókilderi de osy kúnderi ótkiziletin trenıngterge tegin qatysa alady», - dep atap ótti mınıstrlikten.
Vedomstvo aqparatyna sáıkes, trenıngten ótken ár qatysýshyǵa shara sońynda arnaıy sertıfıkat tabystalady. Bir aptalyq oqytý kýrsynan ótken ekskýrsııa júrgizýshi-gıdter Dúnıejúzilik týrıstik gıdter qaýymdastyqtary federatsııasy (WFTGA) atynan arnaıy sertıfıkatqa ıe bolady.
