«Turan» men «Qyzyljar» oıynynda qazylyq etken tóreshiler qyzmetinen shettetildi

ASTANA. KAZINFORM – Tımýr Kýmashev pen Georgıı Chehovskıı maýsymnyń sońyna deıin jumysynan shettetildi. Bul týraly QFF-nyń baspasóz qyzmeti habarlady. 

QFF Tórelik jáne ınspektsııa departamentiniń dırektory Nýný Aleshandre Parreıra de Kashtrý Qazaqstan Premer-lıgasynyń 16-týry aıasynda ótken «Turan» - «Qyzyljar» matchyndaǵy tóreshiniń daýly sheshimine baılanysty resmı túsinikteme berdi.

Tórelik jáne ınspektsııa departamenti qoǵamda úlken rezonans týdyrǵan epızodty qarap, bas tóreshi Tımýr Kýmashev pen vıdeokómekshi Georgıı Chehovskııdiń kelisilgen oıyndarǵa qatysy bolýy múmkin degen QFF Integrıtı ofıtseriniń málimetin zerttedi. 

12 shildede ótken matchtyń 84-mınýtyndaǵy epızod jan-jaqty taldanyp, beınematerıaldar qaraldy. Tóreshilerdiń túsiniktemeleri men sarapshylar pikiri tyńdaldy. 

– Tekserý barysynda «Turan» qorǵaýshysy shabýylshyny eki qolymen ustaǵany anyqtaldy. Alaıda shabýylshynyń keıingi áreketi: ádeıi qulaý jáne shynaıy janasýǵa saı kelmeıtin sımýlıatsııa retinde baǵalandy. 11 metrlik aıyp dobyn belgileýge sebep bolǵanymen, bul jaǵdaıda eń durys sheshim – penaltı belgilemeý edi.

Bas tóreshi men VAR tarapy epızodty jetkilikti kásibı deńgeıde baǵalamady. Sondaı-aq tóreshiler brıgadasynyń ózara úılesimdi áreket etpeýi saldarynan negizsiz sheshim qabyldanǵany tirkeldi, - delingen resmı túsiniktemede. 

Buǵan qosa, Tımýr Kýmashev osyǵan deıin QFF Integrıtı ofıtseriniń usynysymen bir aıǵa tóreshilikten ýaqytsha shettetilgen bolatyn. Al Georgıı Chehovskııge qatysty tergeý júrgizilgenge deıin ony da qyzmetinen shettetý usynylǵan. Atalǵan eki tulǵa da kelisilgen oıyndarǵa qatysy bar degen kúdikpen júrgizilip jatqan tergeýge ilikken.

QFF tóreshilik júıesine degen senimdi saqtaý jáne onyń bedelin qorǵaý maqsatynda, sondaı-aq Integrıtı ofıtseriniń usynymyna sáıkes, Tımýr Kýmashev pen Georgıı Chehovskıı 2025 jylǵy maýsymnyń sońyna deıin QFF aıasyndaǵy matchtardan shettetildi. 

Eske sala keteıik, buǵan deıin «Turan» komandasy qatarynan segizinshi ret jeńilgenin jazǵan edik.