Turan jolbarysyn qaıta jersindirý úshin Balqash jaǵasyna 51 qulan jiberiledi

ASTANA. QazAqparat – Ekologııa jáne tabıǵı resýrstar mınıstrligi Turan jolbarysyn qaıta jersindirý úshin 2024-2026 jyldar aralyǵynda Іle-Balqash memlekettik tabıǵı qoryǵynyń aýmaǵyna 51 qulan jibermekshi, dep habarlaıdy QazAqparat tilshisi.

Bul týraly mınıstrliktiń 2024-2026 jyldarǵa arnalǵan bıýdjet jobasynda aıtylǵan.

«Turan jolbarysyn reıntrodýktsııalaý úshin jaǵdaı jasaý jáne Ulytaý taýly alqabynyń tabıǵı jáne tarıhı-mádenı obektilerin saqtaýǵa járdem kórsetý» dep atalatyn bıýdjet baǵdarlamasynyń aıasynda Balqash mańynan joıylyp ketken Turan jolbarysynyń popýlıatsııasyn qalpyna keltirý kózdelip otyr.

«Bıýdjettik baǵdarlamanyń túpkilikti nátıjesi - qulandy «Іle-Balqash» memlekettik tabıǵı qoryǵynyń aýmaǵynda qaıta jersindirý. Osylaısha 2024 jyly - 17, 2025 jyly - 17, 2026 jyly - 17 qulan jiberiledi», - dep jazylǵan baǵdarlama jobasynda.

Qujattan 2022 jyly atalmysh qoryqqa 13 qulannyń jiberilgenin kórýge bolady.

Bıýdjettik baǵdarlama aıasynda jobaǵa grant esebinen 2024 jyly - 159 mln 800 myń teńge, 2025 jyly - 80 mln 110 myń teńge, 2026 jyly - 80 mln teńge qarastyrylǵan.

Sondaı-aq grantty birlesip qarjylandyrý úshin respýblıkalyq bıýdjetten 2024 jyly - 383 mln 10 myń teńge, 2025 jyly - 329 mln 566 myń teńge, 2026 jyly - 129 mln 581 myń teńge jumsalmaq.