Turan jolbarysy Qazaqstanǵa 2025 jyly oralady –Ekologııa mınıstrligi

NUR-SULTAN. QazAqparat – QR Ekologııa, geologııa jáne tabıǵı resýrstar mınıstliginiń baspasóz hatshysy Oljas Berkinbaev Facebook-paraqshasynda Qazaqstanda Turan jolbarysynyń popýlıatsııasyn qalpyna keltirý sharasy qalaı iske asyp jatqanyn málim etti, dep habarlaıdy QazAqparat tilshisi.

«Búgingi 29 shilde – Halyqaralyq jolbarystar kúnine oraı, áriptesterden osy taqyrypqa qatysty túrli suraqtar kelip túsýde. Osyǵan oraı, búgingi post arqyly jaýap berýge tyrystyq.

HH ǵasyrdyń basynda jer betinde jolbarystyń 9 túri mekendegen, sany 100 myńnan assa, HHІ ǵasyrdyń basynda shamamen 3,5 myńy qalǵan. Turan jolbarystarynyń sońǵy ókilderi 1970 jyldary joǵalyp ketken.

Qazirgi tańda Ekologııa, geologııa jáne tabıǵı resýrstary mınıstrligi Balqash mańynda jolbarys popýlıatsııasyn qalpyna keltirýdiń 15 jylǵa arnalǵan baǵdarlamasyn jasady. Ol ańnyń meken etý ortasyn daıyndaý, jolbarysty tabıǵatqa jiberý jáne baǵdarlamanyń júzege asýyn baqylaý sharalaryn qamtıdy», -dep jazdy mınıstrlik ókili.

Aýtynsha, 2018 jyly «Іle-Balqash» rezervaty qurylyp, onda bıotehenıkalyq sharalar arqyly qaban, qulan, qaraquıryqtardy kóbeıtý, buqar buǵylarynyń popýlıatsııasyn qalpyna keltirý jumystary júrip jatyr.

«Osy atalǵan sharalar oryndalǵannan keıin ekojúıe jolbarys popýlıatsııasyn ustap turýǵa qabiletti bolmaq.

Aıta keteıik, 2010 jyly Qazaqstan halyqaralyq jolbarys sammıtinde Ortalyq Azııaǵa Turan jolbarystaryn qaıtarýǵa daıyn ekenin málimdegen. Al 2017 jyly Qazaqstan men Búkilálemdik jabaıy tabıǵat qory (WWF) Ońtústik Balqash mańy men Іleniń Delta aýdanynda jolbarystyń reınstrodýktsııasy Baǵdarlamasyn júzege asyrý týraly Memorandýmǵa qol qoıyldy. Elimizge alǵashqy jolbarystar 2025 jyly ákelinbek», - deıdi Oljas Berkinbaev.

Buǵan deıin QR Ekologııa, geologııa jáne tabıǵı resýrstar mınıstrligi Birikken Ulttar Uıymynyń damý baǵdarlamasymen birlesip Іle-Balqash ekojúıelerin qalpyna keltirýge arnalǵan jobany iske qosqanyn habarlaǵan edik.