Turan jolbarystaryn tabıǵı ortaǵa shyǵarýdy josparlap otyrmyz – Ekologııa mınıstrligi
ASTANA. KAZINFORM – Búginde elimizde Turan jolbarysyn qaıta jersindirý protsesi júrip jatyr.
Ekologııa jáne tabıǵı resýrstar mınıstrligi Dúnıejúzilik jabaıy tabıǵat qory (WWF) jáne BUU Damý baǵdarlamasymen (BUUDB) birlese júzege asyryp jatqan mańyzdy tabıǵatty qorǵaý bastamalarynyń biri – jolbarysty tabıǵı ortaǵa qaıtarý baǵdarlamasy.
Osy maqsatta 2017 jyly Ekologııa jáne tabıǵı resýrstar mınıstrligi men WWF arasynda yntymaqtastyq týraly memorandýmǵa qol qoıylýy, osy baǵyttaǵy jumystardyń resmı bastalýyna negiz boldy. Ol úshin 2018 jyly jalpy aýmaǵy 415,2 myń gektar n «Іle-Balqash» memlekettik tabıǵı rezervat quryldy.
- Rezervat aýmaǵynda kordondar salyndy, toǵaıly orman qalpyna keltirilip, aýmaqty qorǵaý men monıtorıng júrgizý ınfraqurylymy jasaldy. Sondaı-aq azyqpen qamtý maqsatynda buhar buǵysy men qulanǵa arnalǵan volerler salyndy. 2018–2023 jyldar aralyǵynda 200-den astam buhar buǵysy ákelindi. Alǵash jiberilgen sátten bastap buǵylarǵa spýtnıktik qondyrǵy taǵylyp, olardyń taralý aımaǵyn baqylaýǵa múmkindik berildi. Sonymen qatar 2022 jyldan bastap rezervat aýmaǵyna shamamen 119 qulan kóshirildi, olar tabıǵı ortaǵa sátti beıimdeldi, - dedi Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha rezervatta 3,5 gektar aýmaqta jolbarystarǵa jáne 1 gektar aýmaqta qabandarǵa arnalǵan volerler, sondaı-aq qajetti jabdyqpen qamtylǵan veterınarııalyq pýnkt bar.
- 2024 jylǵy kúzde Nıderlandydaǵy Hoenderdaell haıýanattar baǵynan «Іle-Balqash» rezervatyna eki jolbarys (atalyq, analyq) jetkizildi. Qazir jolbarystar rezervat aýmaǵyndaǵy volerde jáne mamandardyń kúndelikti baqylaýynda. Urpaq alǵannan keıin jáne ań aýlaýdy meńgergen soń jas jolbarystardy tabıǵı ortaǵa shyǵarý josparlanǵan. Al ata-analyq jup ǵylymı jáne aǵartýshylyq maqsatta vızıt-ortalyq janyndaǵy volerde qalady, - deıdi Orman sharýashylyǵy jáne janýarlar dúnıesi komıtetiniń basshysy.
Eske sala keteıik, «Іle-Balqash» rezervatynda jolbarystardy jersindirý 2024 jyly qolǵa alyndy.