Turan jolbarysyn jersindirý: Keler jyly Reseıden Balqashqa 3-4 jolbarys ákelinedi
ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Turan jolbarysy popýlıatsııasyn qalpyna keltirý jumystary jóninde aıtyp berdi. Osylaısha Qazaqstan aýmaǵynda 70 jyldan keıin alǵashqy jabaıy jolbarystar paıda bolmaq.
Mınıstrdiń aıtýynsha, bıyl Turan jolbarysy men Prjevalskıı jylqysyn tarıhı mekeninde jersindirý boıynsha eki úlken joba belsendi júzege asýda.
Jolbarystardy tarıhı mekenine qaıta jersindirý baǵdarlamasy aıasynda Almaty oblysynda Іle-Balqash memlekettik tabıǵı rezervaty quryldy.
− Jolbarystyń tabıǵı azyq qoryn qaıta qalpyna keltirý úshin 2018-2024 jyldary rezervat aýmaǵyna 205 toǵaı buǵysy ákelindi, 100-den astam qulan kóshirildi, elikter men qabandar popýlıatsııasy kóbeıtildi. Bıyl kúzde Іle-Balqash rezervatynda arnaıy torly qorshaýda ósirý úshin Nıderlandydan 2 jolbarys ákelindi, - dedi mınıstr Úkimet úıinde ótken baspasóz máslıhatynda.
Sondaı-aq, 2025 jyly Reseı Federatsııasynan 3-4 jolbarys alyp kelý kútilýde.
− Ákelingen jolbarystardyń tuqymdary Qazaqstan aýmaǵynda 70 jyldan keıin qaıta paıda bolǵan alǵashqy jabaıy jolbarystar bolady dep úmittenemiz, - dedi E. Nysanbaev.
Eske sala ketsek, Bogdana jáne Kýma esimdi qos jolbarystyń elge kelýi Dúnıejúzilik jabaıy tabıǵat qory (WWF) men BUU-nyń Damý baǵdarlamasy aıasynda júzege asqan. Kóshirý protsesi Orman sharýashylyǵy jáne janýarlar dúnıesi komıteti men Nıderlandy ortalyǵy arasyndaǵy memorandýmǵa qol qoıýdan bastalyp, jolbarystardyń tuqymyn kóbeıtý úshin aqysyz negizde ákelingen.
