«Turan» fýtboldan Birinshi lıga oıyndaryn sátsiz bastady
ASTANA. KAZINFORM — Fýtboldan Birinshi lıga komandalary arasyndaǵy Qazaqstan chempıonatynyń birinshi týrynyń alǵashqy oıyn kúni ótti.
Dop dodasy 2 sáýirde bastalyp, 22 qazanda máresine jetedi. Onda barlyǵy 14 komanda baq synaıdy.
Qazaqstandyq jankúıerler tarapynan «Turan» (Túrkistan) — «Akademııa Ońtústik» (Shymkent) kezdesýine erekshe qyzyǵýshylyq bolǵany ras. Byltyr Premer-lıgadan túsip qalǵan túrkistandyq komanda bıyl komanda quramyn kúsheıtip, aldaǵy jyly qaıtadan úzdikter qatarynan kórinýdi qalaıdy. Degenmen olar alǵashqy týrda oılamaǵan jerden qarsylasyna ese jiberip qoıdy.
Kezdesý barysynda shymkenttik klýbtan Ádilbek Jánibekuly 3-mınýtta esep ashsa, 7-mınýtta túrkistandyq komandadan Qýanysh Dúısenbekuly tarazy basyn teńestirdi.
Oıynnyń 79-mınýtynda «Akademııa Ońtústik» sapynan Álibek Qaldar kezdesý núktesin qoıdy.
Osylaısha «Turan» qarsylasyna 1:2 esebimen jol berip, birinshilikti sátsiz bastady.
Sondaı-aq Oraldyń «Jaıyǵy» syrt alańda Túrkistan oblysynyń «Arysyn» 1:0 esebimen jeńse, «Han táńiri» (Almaty) men «Kaspıı-J» (Aqtaý) 2:2, «Tobyl-J» (Qostanaı) men «Elimaı-J» (Semeı) 1:1 esebimen teń tústi.
Endi 3 sáýirde «Qaırat-J» (Almaty) men «Shahter» (Qaraǵandy), «Taraz» ben «Ekibastuz» (Pavlodar oblysy), «Astana-J» men «Aqtóbe-J» oınaıdy.
Al ekinshi týr oıyndary 16 jáne 17 sáýir kúnderine belgilengen.
