«Turan-Astana» ýnıversıtetiniń úzdik stýdentteri Toqtar Áýbákirov atyndaǵy stıpendııany ıelendi
ASTANA. 21 aqpan. QazAqparat - Búgin elordadaǵy «Turan-Astana» ýnıversıtetiniń úzdik stýdentterine Keńes Odaǵynyń Batyry, Qazaqstannyń Halyq Qaharmany, ushqysh-synaqshy, ǵaryshker-zertteýshi Toqtar Áýbákirov atyndaǵy stıpendııany tapsyrý rásimi ótti.
Saltanatty sharaǵa Halyq qaharmany Toqtar Áýbákirov, Qazaqstan Joǵary oqý oryndary qaýymdastyǵynyń prezıdenti Rahman Alshanov jáne ýnıversıtet rektory Gúljamal Japarova qatysty.
Batyr atyndaǵy stıpendııany taǵaıyndaýdaǵy maqsat stýdentterdi oqýǵa, ǵylymı-zertteý qyzmetine yntalandyrý bolyp tabylady. Sonymen qatar, joǵary oqý orynynda bilim alýshylar arasyndaǵy qabiletti, daryndy ári zerek stýdentterge materıaldyq qoldaý kórsete otyryp, olardyń ómirlik ustanym tárbıesine áser etý, stýdent qaýymynyń elimizdiń ataǵyn shyǵarǵan batyrlarǵa degen qurmetin oıatyp, patrıottyq sezimdi arttyrý bolyp otyr.
«Biz bul stıpendııany talantty jastarymyzǵa azǵantaı bolsa da qoldaý jasasaq degen nıetpen taǵaıyndap otyrmyz. Stıpendııanyń tuńǵysh ıegerleri - kileń úzdikter. Men olardyń óz keleshekterine úlken maqsattar qoıa alatynyna senemin. Óz aldyna zor maqsat qoıa bilgen azamattardyń ómir joldary jarqyn ári qabyldaǵan sheshimderi oń bolatynyna da senimim bar», - dedi T. Áýbákirov.
Jıyn barysynda Halyq qaharmany Toqtar Áýbákirov ýnıversıtettiń stýdentteri Elına Sýleımenovaǵa, Baıan Turysbekovaǵa, Almas Qudaıbergenov pen Aqnur Toqmambetovaǵa jáne Saltanat Zulharnaevaǵa óziniń atynda taǵaıyndalǵan tuńǵysh stıpendııanyń arnaıy sertıfıkattaryn tabys etti.
