Turaqtylyqtyń máni men mańyzyn Ýkraınanyń qazirgi ahýalynan baıqaýǵa ábden bolady - N.Nazarbaev
ASTANA. QazAqparat - Turaqtylyqtyń máni men mańyzyn Ýkraınanyń qazirgi ahýalynan baıqaýǵa ábden bolady. Búgin Aqordada ótken Úkimettiń keńeıtilgen otyrysynda Elbasy Nursultan Nazarbaev osylaı dedi.
«Qurmetti halqym, qazaqstandyqtar, turaqtylyq pen beıbitshilik, bizdiń eń basty qundylyǵymyz ekenin men táýelizdiktiń birinshi kúninen bastap aıtyp kelemin. Biz birlikti baǵalaı bilgen, tatýlyqty táý etken halyqpyz. Jamannan jerinip, jaqsydan úırengen elmiz. Sonyń nátıjesinde búgingi Qazaqstan jańa Qazaqstan bolyp qalyptasyp, dúnıejúzinde úlken dárejege ıe bolyp otyr. Birlikti eldiń bıigin ózgeler bizdiń jetistikterimizge qarap biledi. Birliksiz jurttyń jaǵdaıyn biz basqalardan kórip otyrmyz. Turaqtylyqtyń máni men mańyzyn Ýkraınanyń qazirgi ahýalynan baıqaýǵa ábden bolady», - dedi Elbasy.
Memleket basshysy sońǵy jyldary bul elde adamdar eńbek etýdi umytyp, jurttyń barlyǵy jappaı berekesizdikke boı uryp, narazylyq sherýi sánge aınalǵanyn basa aıtty.
«Adamdar mıtıngke kúndelikti jumysqa shyǵatyndaı bolyp keletin boldy. Onyń nege ákep soqqan ózderińiz de bilesizder. Ondaı tártipsizdik qaıda aparyp soqtyrǵany bizge belgili bolyp otyr, tóńiregimizdegi tájirıbe de jetkilikti. El ishinen jaý izdep, birin-biri kemsitý eshqashan da eshbir memleketti jaqsylyqqa aparmaıdy», - dedi N.Nazarbaev.
QR Prezıdenti kezinde odaqtas respýblıkalardyń ishindegi eń qýatty elderdiń biri bolyp kelgen Ýkraına qazir soǵys órtine aınalǵan, 1 eldiń azamattary bir-birine oq atyp, kún saıyn beıbit turǵyndardyń qany tógilip jatqanyn atap ótti.
«Memlekettiń damýy, Ýkraınanyń damýy ondaǵan jylǵa artqa qaraı ketti. Qazynasy qańyrap, óndiristeri toqtap qaldy. Júzdegen áleýmettik nysan iske alǵysyz bolyp, qıratyldy. Turalaǵan ekonomıkany qaıta qalpyna keltirýge ondaǵan jyldar kerek», - dedi Elbasy.
