Turaqtylyq jaǵdaıynda ǵana damýǵa jol bar - Elbasy N.Nazarbaev
ANA. 15 naýryz. QazAqparat /Gúlmıra Álıakparova/ - Búgin Astanada birqatar elordalyq azamattarǵa páter kiltterin tabys etken Elbasy Nursultan Nazarbaev, memlekettiń damýyna eldegi ishki turaqtylyq jaǵdaıynda ǵana qol jetkizýge bolatyndyǵyn aıtty.
Prezıdent Kongress-Hollda ótken saltanatty shara barysynda sóılegen sózinde, qazirgi álemde oryn alyp jatqan úrdisterge qaramastan, Qazaqstanda jumyssyzdyq aýyzdyqtalyp, jańa eńbek oryndary qurylyp jatqanyn, qarapaıym halyqqa bıznespen aınalysýǵa joldar ashylyp, turǵyn úı túıitkilderin sheshý máseleleri toqtatylmaǵanyn atap ótti.
Elbasy, daǵdarystyń saldarynan búginde kóptegen elder kedeılikten aryla almaı, 250 mln.-nan astam adam jumyssyz qalǵanyn, 1 mlrd.-qa jýyq adam tolyqqandy tamaqtanbaı ne bolmasa ashyǵyp otyrǵanyn, jyl saıyn 5 mln.-ǵa jýyq bala ashtyqtan kóz jumatynyn aıtty. Onyń syrtynda ǵalamshardy birinen soń biri qasiretke batyryp otyrǵan tehnogendik jáne tabıǵı apattar bar. Bir elder órshigen ultaralyq jáne dinaralyq janjaldardyń aldynda sharasyz. Kúnsaıyn ondaǵan adamdar qaqtyǵystardyń qurbany bolýda.
Prezıdent sondaı-aq, kórshiles Qyrǵyzstandaǵy turaqsyzdyqtan qaza bolǵan 380 azamatty, Soltústik Afrıkadaǵy ahýaldy, ekonomıkasy ondaǵan mlrd. AQSh dollaryn joǵaltqan Mysyr elin mysalǵa keltirdi.
«Mine, aýyzbirshilik, tártip pen turaqtylyq bolmaǵan eldiń erteńi osyndaı bolady. Meniń qoǵamdaǵy turaqtylyq pen bir-birine degen qurmet jaıynda árdaıym aıtýymnyń sebebi osy. Tek turaqtylyq jaǵdaıynda ǵana damýǵa jol bar. Ózgeshe bolýy múmkin emes. Jyl saıyn álemde 30-ǵa jýyq áskerı qaqtyǵystardyń oshaǵy tutanady. Kóptegen elder men halyqtar turaqsyzdyq pen buldyrly bolashaqtan zardap shegip otyr. Ózderińiz kórip otyrǵandaı, bizdiń elde jaǵdaı buǵan múldem qarama-qaıshy. Biz Táýelsizdiktiń 20 jyly ishinde ekonomıkany 12 esege arttyrdyq. Eshbir jas memleket óziniń alǵashqy 20 jylyndaǵy damýynda mundaı qarqynǵa qol jetkizgen emes», - dedi N.Nazarbaev.
