Turaqtylyq pen birliktiń damýyna úles qosqan azamattardy árdaıym qoldaýymyz kerek - Memleket basshysy
p; Qazannyń 26-sy. QazAqparat /Aıdar Ospanálıev/ - «Biz elimizdegi turaqtylyq pen birliktiń saltanat qurýyna úles qosyp júrgen azamattardyń barlyǵyna qoldaý kórsetýimiz kerek. Ondaı azamattardyń elimizge tanymal bolǵany durys. Osyǵan oraı olarǵa arnaıy marapat taǵaıyndaǵan jón. Mysaly, osyndaı azamattardy Qazaqstan halqy Assambleıasynyń «Qoǵamdyq birlik» altyn medalimen marapattaýǵa bolady. Bul týraly búgin Elbasy Nursultan Nazarbaev Qazaqstan halqy Assambleıasynyń 15-shi sessııasynda málim etti,
dep habarlaıdy QazAqparat.
Memleket basshysynyń sózine qaraǵanda, bul shara, sóz joq, Assambleıanyń bedelin arttyrady. «Sonymen qatar, etnıkaralyq jáne konfessııaaralyq tatýlyqtyń qazaqstandyq úlgisin keńirek taratý qajet. Tap osy maqsatta elimizdiń Eýropadaǵy qaýipsizdik jáne yntymaqtastyq uıymyna tóraǵalyǵyn tıimdi paıdalanýǵa bolady. Halyqaralyq uıymǵa tóraǵalyq etý barysynda biz etnıkaralyq jáne konfessııaaralyq kelisim máselesine basa nazar aýdaratyn bolamyz. Bul faktor Qazaqstannyń «Eýropaǵa jol» memlekettik baǵdarlamasynda da aıqyn kórsetilgen. Sondyqtan Qazaqstan halqy Assambleıasynyń ókilderi elimizdiń osy baǵyttaǵy tájirıbesin ózge tilde jazyp, túrli oqýlyqtar túrinde taratýy kerek», dedi Elbasy.
