Turaqty jumysy joq 3,7 myń qazaqstandyq shaǵyn nesıe aldy
PAVLODAR. QazAqparat - Senator Baqytjan Jumaǵulov Qazaqstan Prezıdentiniń tórtinshi áleýmettik bastamasy aıasynda jumyssyz júrgen jáne ózin-ózi jumyspen qamtyǵan azamattarǵa shaǵyn nesıe berýge baǵyttalǵan jumystarǵa oń baǵa berdi, dep habarlaıdy QazAqparat tilshisi.
«Tórtinshi bastama boıynsha shaǵyn nesıe kólemin arttyrý úshin qosymsha 20 mlrd teńge qarajat bólinip, jalpy somasy 62 mlrd teńgege jetti. Byltyr jaǵdaı múlde basqasha edi», - dedi Baqytjan Jumaǵulov Pavlodarda «Nur Otan» partııasy oblystyq aktıviniń otyrysynda.
Senatordyń aıtýynsha, jumyssyz júrgen jáne ózin-ózi jumyspen qamtyǵan 14 myń azamatqa shaǵyn nesıe berý josparlanǵan. Qazirge deıin 3,7 myń azamatqa jalpy somasy 21,3 mlrd teńge mólsherinde nesıe berildi.
«Jumystyń basy jaqsy bastaldy, biraq qarqyndy kúsheıtý qajet. Qazir tamyz, respýblıka boıynsha jospardaǵynyń 27%-y nesıe alsa, oblysta bul kórsetkish 23%-dy quraıdy nemese 148 adam», - deıdi ol.
B. Jumaǵulovtyń aıtýynsha, Pavlodar oblysyndaǵy jumyssyz jáne ózin-ózi jumyspen qamtyǵan azamattardy shaǵyn nesıege tartý qajet.
