Turaqty jumys taba almaǵan aqtóbelik ómir boıy jınaǵan kitaptaryn satyp jatyr
AQTÓBE. QazAqparat - Aqtóbe qalasyndaǵy Turǵyndar qalashyǵy aýdanynda álem ádebıeti, qazaq ádebıeti klassıkasynyń kitaptary satylyp jatyr. Qala turǵyny jumysqa ornalasa almaǵan soń ómir boıy jıǵan dúnıesin satýǵa shyǵarǵan, dep habarlaıdy QazAqparat tilshisi.
Buryn kez kelgenniń qolyna túse bermeıtin kitap baǵasy óte arzan. Árqaısysy 400-600 teńge turady. Sońǵy 10 jylda kitap satyp, jan baǵyp otyrǵan Oleg óz úıindegi shaǵyn kitaphana qorynda áli 3 myń kitaptyń bar ekenin aıtyp berdi. Ol tipti oqyrmandary izdegen avtorlardy taýyp berý ázir eken. Bunymen qosa ózi oqyǵan kitabynyń, oqyrmanǵa mazmunyn aıtyp, túsindiredi. Kitap surap kelgen oqyrmandardyń jasy men qyzyǵýshylyǵyna qaraı tańdap, óz usynystaryn da jetkizip otyrady. Aıta keterligi, satýshydan medıtsına salasynda bilim alyp júrgen stýdentterdiń kóbi psıhologııa salasynyń kitaptaryn suraıdy eken.
«Jastardyń keıbiri kórkem ádebıtetti emes, mıllıondap tabys tabýdyń joldaryn úıretetin kitapty suraıdy. Olar qazir oqyp shyǵamyn, erteń baılyqqa kenelemin degen oıda. Men únemi bir jerde turamyn, eshkimge zııanymdy tıgizbeımin. Polıtsııa qyzmetkerleri kelip, jaıma bazarǵa tyıym salynǵanyn aıtady, biraq sóılesip, túsinisip ketemiz. Olar meni jaýapkershilikke tartyp, aıyppul salǵan emes. Keıbiri meni bala kezinen tanıdy eken. Sol kúnderin aıtyp, eske alady»,- dedi Oleg.
Ol kitabyn qımastyqpen satady. Keıde kóship, basqa óńirge, elge ketip bara jatqan adamdar Olegti taýyp, kitaphanasyndaǵy kitaptaryn tegin beretin kórinedi, ózara kóterme baǵamen de kelisedi eken. Bul onyń tabysy, jumysy.
«Meni eshkim jumysqa almaıdy. 56 jastamyn. Qartaıdyń, jasyń kelgen dep aıtady. Eger kitap satyp, jan baqpasam, ákimdikke baryp, járdemaqy suraımyn. Al men surap, qol jaıǵym kelmeıdi»,- dedi ol.
Ózi sońǵy jyldary jaryqqa shyqqan kitaptardy oqyp, oqıǵa jelisin túsinbegen soń qaıta satýǵa qoıǵan. «Kitap oqyǵan óte paıdaly, saýatyńdy arttyrady. Oqıǵa jelisinen ómirlik sabaq alasyń, oqyp otyryp sózderdiń durys jazylýyn bilesiń. Qazir saýatty jaza alatyndar az. Bári kitap oqymaǵannan bolady. Buryn álem ádebıetiniń kitaphanasyna 200 kitap engen edi. Sonyń bárin oqyp, ony jınaý úlken mártebe boldy»,- dedi ol.
Oleg buryn júrgizýshi bolyp jumys istegen. Aldymen ata-anasy, keıin ózi 40 jyl boıy kitap jınap, bárin oqyp shyqqan. Sońǵy aqshasyna alǵan kitaptaryn arada shırek ǵasyr ótken soń qaıta satyp jatyr. Kórkem ádebıetpen qatar bala kútimi, tamaq ázirleý joldary týraly jınaqtar men birneshe salalyq kitap bar.
