Turaqty ekonomıkalyq ósimniń jylyna kem degende 4 paıyz bolýyn qamtamasyz etý kerek - Prezıdent

ASTANA. QazAqparat – Turaqty ekonomıkalyq ósimniń jylyna kem degende 4 paıyz bolýyn qamtamasyz etý kerek. Bul týraly Májilistiń jalpy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Men keshe Parlament sessııasynyń ashylýynda naqty mindetterge toqtaldym. Úkimet strategııalyq baǵdarymyzdy júzege asyra otyryp, mynadaı máselelerge basa mán berýge tıis. Turaqty ekonomıkalyq ósimniń jylyna kem degende 4 paıyz bolýyn qamtamasyz etý kerek. Sondyqtan ekonomıkanyń damý úlgisin túbegeıli ózgertýimiz kerek. Ol úshin ártaraptandyrý jumysyn júıeli júrgizip, naryq qaǵıdalaryn nyǵaıtý mańyzdy. Túpki maqsatymyz – joǵary tehnologııaǵa negizdelgen, ózin-ózi tolyq qamtamasyz etetin jáne básekege qabiletti ekonomıka qurý», - dedi Prezıdent.

Memleket basshysy elimizdiń basty óńirlik ınvestıtsııalyq hab retindegi ustanymyn kúsheıtý qajettigin basa aıtty.

«Sońǵy jyldary monopolııasyzdandyrý jáne shynaıy básekelestik orta qurý aıasynda baıypty jumys júrgizildi. Degenmen, qol jetkizgen jetistikpen turyp qalýǵa bolmaıdy. Úkimetten ekonomıkalyq erkindikti odan ary keńeıtý jáne memlekettik naryqtyq protsesterge yqpaly deńgeıin tómendetý úshin júıeli is-sharalar talap etiledi. Bul ádisterdi júzege asyrý elimizdiń ınstıtýtsonaldy kemelendenýin, onyń túrli ishki jáne syrtqy kúızelisterge turaqtylyǵyn arttyrýǵa múmkindik beredi», - dedi Prezıdent.