Turaqty aılyǵy joq ımamdardyń máselesi sheshiledi
«Dinı basqarmanyń ishki erejelerine sáıkes, meshitterge túsetin qarajattyń 30 paıyzy ortalyqqa baǵyttalady. Óıtkeni ózderiniń ákimshilik shyǵyndary bar, aılyq tólenedi. Biraq, keıbir aýyldyq jerlerde múldem aqsha túspeıtin meshitter bar ekenin bilemiz, sáıkesinshe olardyń jaǵdaıy da óte nashar. Bul turǵyda qol qýsyryp otyrǵan joqpyz. Byltyr «Ýaqyp» korporatıvtik qaıyrymdylyq qory qurylǵan bolatyn, sol Qordyń túsken qarjysynyń aıasynda elimiz boıynsha 355 shalǵaı aýyldardaǵy jáne túrmede ekstremızm men lańkestik baptary boıynsha sottalǵandarmen jumys isteıtin ımamdarǵa aıyna 50-den 80 myń teńgege deıin ústemeaqy tólep otyrmyz», - dedi Berik Aryn.
Sonymen qatar ol aılyqsyz jumys istep jatqan meshit qyzmetkerlerine qoldaý jasaý sharalary qaralyp jatqanyn jetkizdi.
«Jaz boıy jumys istep, búkil meshitter boıynsha esep-qısap júrgizdik. Olarda turaqty aılyq alatyn 30 paıyz ǵana ımam bar. 70 paıyzynda turaqty aılyq joq. Bul máseleni túpkilikti sheshý jolynda Úkimetke tıisti usynystarmen shyqtyq. Osy oraıda naqty jumystarmen aınalysatyn adamdardyń máselesin sheshý eskerilgen», - dedi vıtse-mınıstr.
Aıta keteıik, Áleýmettik-mádenı damý jáne ǵylym komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy talqylandy. Jobada memlekettik qyzmetshilerdiń din salasyndaǵy ádebine baılanysty birqatar talaptar naqtylanǵan.
