Turaqtandyrý qoryn qalyptastyrýǵa ÁKK-lerdi qatystyrmaý usynyldy
ASTANA. QazAqparat - Turaqtandyrý qoryn qalyptastyrý baǵdarlamasynan Áleýmettik-kásipkerlik korporatsııalaryn (ÁKK) shyǵarý týraly usynys jasaldy. Bul týraly Parlament Májilisinde aýyldyq jerlerde bıznesti damytýda ÁKK-ler róline arnalǵan dóńgelek ústel otyrysynda depýtat Sparhan Omarov málim etti, dep habarlaıdy QazAqparat.
«Ókinishke qaraı, qazirgi kezde Áleýmettik-kásipkerlik korporatsııalardyń kóbisi ekonomıkanyń basqa salalaryndaǵy jobalarmen aınalysyp jatyr. ıAǵnı qurylys, jer qoınaýyn paıdalaný, óńdeý ónerkásibi jáne basqa da baǵyttarda qamtylǵan. ÁKK-lerdiń basym bóligi aýyl sharýashylyǵyna tıisti deńgeıde kóńil bólip otyrǵan joq. Osy oraıda azyq-túlik taýarlardy, óńirlik turaqtandyrý qorlaryn qurý men paıdalaný sharalarymen shektelip keledi», - dedi S. Omarov.
Onyń sózine qaraǵanda, turaqtandyrý qorlaryn qurý men paıdalaný baǵytynda birqatar problemalar týyndap otyr jáne olar óz sheshimin tappaı keledi. Kókónisterdi turaqtandyrý qorlaryna satyp alý kezinde ónimniń búlinýine baılanysty shyǵynǵa tap bolý táýekeli bar.
«Ónim satyp alýǵa bólingen qarjy maqsatty paıdalanylmaı, ÁKK-ler depozıttik shottarynda saqtaýǵa baǵyttalǵany týraly faktiler bar. Birneshe oblysta turaqtandyrý qorlary qurylmaǵan. Birqatar óńirlerde osyndaı qyzmet túri shyǵyndy bolyp otyr. Bul turǵyda turaqtandyrý qoryn qalyptastyrý baǵdarlamasynan ÁKK-ni shyǵarý týraly usynys jasalýda», - dedi Saparhan Omarov.
