Turaqtandyrý qory azyq-túlik baǵasyna qalaı áser etedi
ASTANA. QazAqparat - Saýda oryndaryndaǵy kartop, sábiz, qyzylsha, oramjapyraq kelisi 75 teńgeden bir baǵamen berilýde, dep jazady Altaynews .
«Bıyl jyldaǵydaı turaqtandyrý qorynyń ónimderin satý bastaldy ma? Óskemende jáne Semeıde el tutynatyn negizgi kókónisterdiń baǵasy qanshadan qoıylǵan? Arzan ónimderdi qaıdan alýǵa bolady?» degen saýaldarǵa «Ertis» ÁKK» UK» AQ basqarma tóraǵasynyń mindetin atqarýshy Anton Kramarenko jaýap berdi.
«Óskemen qalasyna qazirgi ýaqytta kúnine shamamen 10-15 tonna aralyǵynda turaqtandyrý qorynyń ónimderi kirgizilýde. Qalada áleýmettik saýda núkteleri tolyq jumys istep tur. Óskemende - 40, Semeı qalasynda - 32 saýda núktelerinde turaqtandyrý qorynyń ónimderi halyqqa usynylýda», - dedi Anton Kramarenko.
Kompanııa ókiliniń sózine qaraǵanda, atalmysh saýda oryndardyń 13-i «Ertis» ÁKK» UK» AQ-na tıesili bolsa, qalǵan oryndar eki qaladaǵy ákimdikter men qaladaǵy saýda dúkenderi arasynda jasalǵan memorandýmdar aıasynda ashylǵan.
«Saýda oryndaryndaǵy kartop, sábiz, qyzylsha, oramjapyraq kelisi 75 teńgeden bir baǵamen berilýde. Bul - naǵyz naryqtyq baǵa. Eki qala boıynsha jergilikti agrofırmalardan 7,5 myń tonna ónim satyp alynyp, saqtaýǵa qoıylǵan. Jalpy quny - 364 mln. teńge. Ónimderdi qaladaǵy mańdaıshasyna «Turaqtandyrý qorynyń ónimderi» dep jazylǵan saýda núktelerinen jáne memorandým jasalǵan arnaıy dúkenderden alýǵa bolady», - deıdi ol.
Atap óterligi, bıyl respýblıka boıynsha eń úlken turaqtandyrý qory Shyǵys Qazaqstanda qurylǵan. Alda korporatsııaǵa qatysty oryndar sanyn Semeıde arttyrýdy josparlap otyr. Qordaǵy ónimder aýylsharýashylyq taýarlarynyń baǵasyn negizsiz qymbattatpaı, aýyzdyqtap otyrýǵa tolyqtaı múmkindik beredi.
