Turaqtandyrý qorlarynda bıýdjetten bólingen 3 mlrd teńge bos jatyr - Saýda mınıstri

NUR-SULTAN. QazAqparat - Turaqtandyrý qorlarynyń shottary men depozıtterinde taýarlardy satyp alýdy júzege asyrý úshin bıýdjetten buryn bólingen 3 mlrd teńge bos qarajat bar. Bul týraly búgin Úkimet otyrysynda QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

Mınıstrdiń aıtýynsha, azyq túlik taýarlary baǵasynyń ósýin baıaýlatatyn birqatar jedel jáne júıeli sharalar qabyldaý úshin barlyq quraldar men múmkindikter bar. Ol úshin eń aldymen jergilikti atqarýshy organdar men baqylaýshy organdardyń aýmaqtyq bólimsheleri qoldanystaǵy tetikterdi barynsha paıdalanýy qajet. Shekti baǵany bekitý rásimin belsendi paıdalaný kerek.

«Turaqtandyrý qorlaryn qalyptastyrý jáne paıdalaný túbegeıli ózgeristerdi talap etedi. Máselen, ótken jyly Shymkent qalasynda jáne Mańǵystaý oblysynda taýar ınterventsııasy múldem júzege asyrylǵan joq. Basqa aımaqtarda ınterventsııalar baǵanyń ósýi oryn alǵan taýar toptarynda júrgizilmeı, basqa taýarlar boıynsha iske asyryldy. Aıtalyq, qorlardan 2 myń tonna kartop satyldy. Onyń ımportqa táýeldiligi tómen bolǵanymen baǵasy da edáýir ósken joq. Al qaraqumyq baǵasynyń 80,5 paıyzǵa ósýi kezinde onyń jalpy satý kólemi tek 213 tonnany qurady. Bul naryqqa áser etpedi», - dedi ol.

Sonymen qatar, Baqyt Sultanovtyń dereginshe, turaqtandyrý qorlarynyń shottary men depozıtterinde taýarlardy satyp alýdy júzege asyrý úshin bıýdjetten buryn bólingen 3 mlrd teńge bos qarajat bar.

«Memleket basshysy olardyń tıimdiligi tómen ekenin atap ótti jáne óńirlik turaqtandyrý qorlarynda áleýmettik mańyzy bar ónimderdiń tabıǵı rezervterin qurýdyń tıimdiligi az tájirıbesinen balamaly quraldarǵa kóshýdi qamtamasyz etýdi talap etti. Osyndaı balamaly quraldardyń biri – jeńildetilgen qarjylandyrý arqyly baǵany ustap turý mindettemelerin qabyldaý boıynsha saýda jelilerin yntalandyrý tetigi bolyp tabylady. Biz ony «aınalym shemasy» dep atadyq jáne óńirlerdi ony belsendi paıdalanýǵa birneshe ret shaqyrdyq. Alaıda, bul quraldy Nur-Sultan jáne Almaty qalalarynan basqa esh jer qoldanbaǵan», - dedi mınıstr.

Onyń atap ótýinshe, is júzinde baǵany tejeýdiń eń yńǵaıly tetigi naryqtyń básekelestigin qorǵaý jónindegi sharalar bolyp sanalady.

«Biraq monopolııaǵa qarsy organdar ony Memleket basshysynyń synynan keıin ǵana belsendi qoldana bastady», - dedi ol.