Turaqtandyrý qorlaryna qatysqan ÁKK-niń jartysynan kóbi sońǵy bir jarym jylda úlken shyǵynǵa ushyrady - S. Ahmetov
ASTANA. 13 tamyz. QazAqparat - Úkimet basshysy Serik Ahmetov QR Óńirlik damý mınıstrligi men Aýyl sharýashylyǵy mınıstrligine jergilikti ákimdiktermen birlese otyryp, elimizdegi agroónerkásiptik keshenniń jobalaryn qoldaý aıasynda Áleýmettik-kásipkerlik korporatsııalardyń (ÁKK) róli men qyzmetin naqtylaýdy tapsyrdy.
«ÁKK-ni damytý úshin qabyldanǵan kontseptsııalarda olardy shyǵynǵa ushyrap otyrǵan baǵdarlamalardan birtindep shyǵarý joldary qarastyrylǵan. Sondyqtan men óńirlerdiń ákimderinen ÁKK-ni shyǵynsyz qyzmet deńgeıine kóterýge sebin tıgizetin usynystaryn QR Úkimetine joldaýyn suraımyn», - dedi Úkimet basshysy búgin ótken Úkimet otyrysynda.
S. Ahmetovtiń aıtýynsha, turaqtandyrý qorlaryna qatysqan ÁKK-niń jartysynan kóbi sońǵy bir jarym jylda úlken shyǵynǵa ushyraǵan.
«Sondyqtan bizge qarjygerlerdi, quqyqqorǵaý organdarynyń qyzmetkerlerin shaqyryp, áleýmettik-kásipkerlik korporatsııalardyń bolashaqta shyǵynsyz jumys isteý joldaryn oılastyrý qajet. Óıtkeni olar bir jyldary óte jaqsy jumys istep paıda ákelse, kelesi jyly ondaı nátıje kórsete almady ǵoı», - dep atap ótti Úkimet basshysy. Onyń aıtýynsha, ÁKK qatysýy kezinde olar aýylsharýashylyq ónimderiniń baǵasyn turaqtandyrýda mańyzdy ról oınady.
«Jýyq arada mınıstrlikterdiń múddeli basshylarynyń basyn qosyp, ÁKK-niń rólin anyqtaý qajet. Olar bolashaqta naryq baǵasyn turaqtandyrýǵa qyzmet ete bere me (ásirese kókónis ónimderi salasynda) nemese olardy basqa memlekettik qurylymdarǵa berý kerek pe?» - degen másele kóterdi S. Ahmetov.
Óz kezeginde Aýyl sharýashylyǵy mınıstri Asyljan Mamytbekov Qazaqstandaǵy ÁKK-niń barlyǵy birdeı shyǵyn keltirmeıtindigin, arasynda paıda túsirip otyrǵandary da bar ekenin atap ótti.
«Eger turaqtandyrý qorlaryndaǵy ÁKK-lerdiń nátıjelerin taldaıtyn bolsaq, Qostanaı, Ońtústik Qazaqstan jáne Almaty oblystaryndaǵy ÁKK-ler basqalarmen birdeı naryqtyq jaǵdaıda qyzmet etse de, shyǵynǵa batpaı, kerisinshe paıdamen shyǵyp otyr. Sondyqtan, eń aldymen ÁKK-lerdiń menedjmentin jaqsartý qajet dep oılaımyn», - dedi A. Mamytbekov.
