Turaqtandyrý qorlaryn qurýdy kózdeıtin zań jobasy birinshi oqylymda maquldandy - Senat
ASTANA. 14 maýsym. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine agroónerkásip keshendi damytý jáne qoldaý máseleleri boıynsha ózgerister men tolyqtyrýlar engizý týraldy» zań jobasyn birinshi oqylymda maquldady.
Eske salsaq, qujatqa Parlamenttiń bir top depýtattary bastamashylyq jasaǵan bolatyn. Bul rette zań jobasymen azyq-túlik qoryn uıymdastyrý jáne ony paıdalaný tártibin, erejelerin zańdastyrýdy qarastyrady. Osyǵan oraı, qujatqa sáıkes azyq-túlik taýarlarynyń óńirlik Turaqtandyrý qorlaryn qalyptastyrý jáne paıdalaný sharalary kózdeledi. Tutastaı alǵanda Turaqtandyrý qory Qazaqstannyń tıisti ákimshilik-aýmaqtyq birligindegi agrarlyq azyq-túlik naryǵyna retteýshilik yqpal jasaý jáne azyq-túlik qaýipsizdigin qamtamasyz etý úshin paıdalanylatyn, astyqty qospaǵanda basqa azyq-túlik taýarlarynyń jedel qory bolady dep kózdeledi.
Al Turaqtandyrý qorlaryn qurýdyń qajettigi azyq-túlik taýarlarynyń negizgi túrleri baǵasynyń maýsymaralyq kezeńde aýyqtýlarǵa ushyraıtyndyǵyna baılanysty bolyp tabylady. Atap aıtqanda, ónim jappaı óndirilgen kezeńde baǵalar tómendep, óndirýshige nuqsan keltirse, al maýsymaralyq kezeńde kerisinshe baǵalar kúrt ósip, tutynýshyǵa nuqsan keltirip jatady. Qor saqtalý merzimi 6 aıdan asatyn áleýmettik mańyzy bar azyq-túlik taýarlarynyń tizbesi boıynsha qalyptasatyn bolady.
Sonymen birge, zań jobasymen ósimdikterdi qorǵaýdyń ınnovatsııalyq ádisterin engizýdi kózdeıtin normalar engizildi. Osyǵan oraı, respýblıkamyzda qoldanylatyn otandyq óndiris gerbıtsıdteriniń assortımenti óte az ekendigin eskere otyryp, depýtattar shyǵatyn eline qaramastan gerbıtsıdterdiń barlyq túrlerin sýbsıdııalaýdy usynady.
