Turaqtandyrý qorlary baǵany ustaı almaı otyr — depýtat
ASTANA.KAZINFORM — Májiliste Joǵary aýdıtorlyq palatanyń esebi qaralyp, áleýmettik mańyzy bar azyq-túlik baǵasyn turaqtandyrýǵa arnalǵan qorlardyń tıimsiz jumysy synǵa alyndy. Depýtattar bul tetik óz maqsatyn oryndamaı otyrǵanyn málimdedi.
— Turaqtandyrý qorlary 2011–2012 jyldary daǵdarysqa qarsy qural retinde qurylǵan bolatyn. Memlekettiń sol kezdegi logıkasy baǵa qubylǵan kezeńderde naqty taýar qory bolýy jáne naryqqa jedel shyǵý múmkindigi arqyly baǵanyń ósýin tejeý, azamattardyń satyp alý qabiletin qorǵaý qajet boldy. Alaıda arada on jyldan astam ýaqyt ótse de, bul mehanızm búgingi tańda bastapqy maqsatyna saı jumys istemeı otyrǵanyn moıyndaýymyz kerek, — dedi Májilis depýtaty Temir Qyryqbaev Facebook jelisinde.
Onyń aıtýynsha, aýdıt qorytyndysy áleýmettik-kásipkerlik korporatsııalardyń baǵany turaqtandyrý protsesine qatysýy tıimsiz ekenin kórsetken. Sonyń saldarynan negizgi azyq-túlik baǵasy ósip otyr: bir jyl ishinde kartop shamamen 40 paıyzǵa, pııaz 20 paıyzǵa qymbattaǵan.
— Bıýdjet qarjysyna satyp alynǵan ónimderdiń halyqqa jetpeı, qoımalarda buzylyp qalyp jatyr. Sońǵy eki jylda alynǵan taýardyń nebári 19%-y ǵana satylǵan, — dedi depýtat.
Ol Qyzylorda oblysyndaǵy jaǵdaıdy mysalǵa keltirip, turaqtandyrý qory qoımalarynda shamamen 1,8 mlrd teńgeniń ónimi turǵanymen, dúkenderde et pen sút ónimderi jetispeıtinin aıtty.
Sonymen qatar keı óńirlerde turaqtandyrý qorlaryna bólingen qarajattyń aınalymǵa jiberilmeı, depozıtterge ornalastyrylǵany anyqtalǵan. Máselen, Batys Qazaqstan oblysynda «Aqjaıyq» áleýmettik-kásipkerlik korporatsııa bir jyl boıy 2 mlrd teńgeden astam qarjyny depozıtte ustaǵanyn synǵa aldy.
— Qazirgi formatta áleýmettik-kásipkerlik korporatsııalardyń baǵany turaqtandyrý tetikterine qatysýy oryndy emes. Ónimniń qashan jáne qandaı kólemde satylatyny aldyn ala josparlanbaıdy, sáıkesinshe esh áreket jasalmaıdy, — dedi Temir Qyryqbaev.
Aıta keteıik, buǵan deıin Premer-mınıstr Oljas Bektenov Saýda mınıstrligine áleýmettik mańyzy bar azyq-túlik taýarlarynyń tizbesin ýaqytsha keńeıtý jumysyn jedeldetýdi tapsyrǵan edi.