Turaqtandyrý qoryndaǵy azyq-túlik jármeńkelerde satyla bastady

ASTANA. KAZINFORM — Ótken demalys kúnderi óńirlerde 20-dan astam azyq-túlik ónimderiniń jármeńkesi ótti.

Saýda komıtetiniń dereginshe, jármeńkelerde jalpy kólemi 1 600 tonnadan astam taǵam saýdalandy. 

Mysaly, Shymkent qalasynyń ózinde jármeńkege shyǵarylǵan 150 tonnaǵa jýyq azyq-túlik óniminyń, 126 tonnasyn jergilikti jurt satyp aldy. Odan bólek S1 sanatyndaǵy jumyrtqa 52-57 teńgeden saýdalanyp, 105 000 danasy satylǵan. Al 26 tonna pııazdyń kelisin shymkenttikter 80 teńgeden satyp alǵan. Odan bólek shymkenttikter kúnbaǵys maıynyń lıtrin 620 teńgeden, sıyr etiniń kelisin 2400-2600 teńge aralyǵynda satyp alǵan.

- Almatyda 865 tonna ónim jármeńkege shyǵarylsa, sonyń 806 tonnasy satylǵan. Almatyda ótken jármeńkelerge 300-ge jýyq otandyq taýar óndirýshi men kásipker qatysqan. Almatyda qanttyń 1 kelisi 370 teńgeden, S1 sanattaǵy jumyrtqanyń danasyn 52 teńgeden, kúnbaǵys maıynyń lıtri 650 teńgeden satyldy.

Al Astanada dástúrli túrde «Soǵym Fest» jármeńkesi ótti. Osynyń aldyndaǵy jármeńkede 100 tonna et ónimi satylsa, bul jolǵy jármeńkede 150 tonna iri qara eti satyldy. Baǵa ádettegideı arzan. Jylqy eti 2300-2500 teńge, sıyr eti 2100-2300 teńgeden. Odan bólek 11 tonna kókónis, 800 keli un (kelisi 186 teńgeden bastalady), 200 keli qant (kelisi 350 teńgeden) satylǵan, - dep jazdy komıtetten.

Jalpy jármeńkelerde tek áleýmettik mańyzy bar azyq-túlik ónimderi ǵana emes, halyq arasynda suranysqa ıe jemis-jıdek, bal, qurt, qaımaq sekildi ónimder satylady.

Ótken aptadaǵy jármeńkelerdiń ereksheligi – birneshe óńirde turaqtandyrý qoryndaǵy ónimder jármeńkelerde saýdalandy. Mysaly, Abaı oblysynda turaqtandyrý qoryndaǵy 5 tonna kartop,sábiz, pııaz ben oramjapyraq jármeńkede kelisi 115 teńgeden satyldy. Aqtóbede turaqtandyrý qoryndaǵy kartop (2,8t) 116 teńgeden, pııaz (1,9t) 170 teńgeden, oramjapyraq 160 teńgeden, sábiz 110 teńgeden(1-1 tonnadan), qant 350 teńgeden (200 kg) satylǵan. Al Qostanaıda ótken jármeńkelerge turaqtandyrý qorynan 11 tonna ónim shyǵarylsa, onyń 8 tonnasy satylǵan. Atap aıtar bolsam, 1 tonna taýyq eti (1000 tg), 2 tonna qaraqumyq jarmasy (135 tg), 1 tonna rojkı (250 tg), 72 000 dana S sanattaǵy jumyrtqa (450-480 tg), 1 tonna sábiz (140 tg), 3 tonna kartop (140 tg).

Budan ózge turaqtandyrý qoryndaǵy azyq-túlik Almaty, ShQO, Qyzylorda, Pavlodar, Oral, Jetisý, Aqmola oblystarynda ótken jármeńkelerde satyldy.

Ulttyq statıstıka bıýrosynyń resmı málimetine saı ótken aptadaǵy ÁMAT taýarlarynyń baǵa ındeksi 100,1% (+0,1%) qurady. 1 apta ishinde keıbir taýar túrleriniń baǵasy arzandaǵan. Mysaly sıyr eti 0,1, qaraqumyq jarmasy 0,7, kúrish 0,8, qant 1,0, sábiz 0,1 paıyzǵa arzandaǵan. Un men aırannyń baǵasy turaqty. Kartop (1,4%) pen pııaz(1,2%) baǵasynyń azdaǵan qymbattaýy baıqalady.