Turaqtandyrý qoryndaǵy azyq-túlik taýarlary sý tasqynynan zardap shekken joq — QR AShM
ASTANA. KAZINFORM - 1 sáýirde Memleket basshysynyń tapsyrmasy boıynsha vıtse-premer Serik Jumanǵarın kóktemgi tasqyn sýdan zardap shekken óńirlerdiń ákimdikterimen, AÓK sektorynyń qarjy ınstıtýttarymen, «Atameken» UKP jáne salalyq memlekettik organdarmen jedel keńes ótkizdi, dep habarlady primeminister.kz.
Aýyl sharýashylyǵy mınıstrliginiń qazirgi derekteri boıynsha, erigen sýdan zardap shekken Aqtóbe, Pavlodar, Aqmola, Qaraǵandy, Qostanaı jáne Abaı oblystaryndaǵy turaqtandyrý qorlarynda búginde 63,4 myń tonna azyq-túlik bar. Barlyq ónim qurǵaq jerde saqtalady jáne tasqyn sýdan zaqym kelgen joq. Basqa óńirlerdiń turaqtandyrý qorlarynda shamamen 110 myń tonna azyq-túlik qory bar jáne qajet bolǵan jaǵdaıda ol qor zardap shekken óńirlerge jedel jóneltilýi múmkin.
«Fermerlerge kómek kórsetýge keler bolsaq, búgingi tańda sý tasqynynan zardap shekken aýyl sharýashylyǵy daqyldary (kúzdik daqyldar, jylyjaılar, baqshalar) týraly aqparat joq. Eger egis maýsymynyń basynda sý shaıǵan ýchaskeler anyqtalsa, egis alqaptary daqyldardy egý jáne ártaraptandyrý arqyly qalpyna keltiriledi. Tótenshe jaǵdaı rejımi jarııalanǵan óńirlerdiń fermerleri úshin shyǵyndardy rastaý kezinde kredıtterdi 24 aıǵa deıin uzartý jáne paıyzdyq mólsherlemeni sýbsıdııalaý kózdelgen. Agrarlyq nesıe korporatsııasynda bul mehanızm jolǵa qoıylǵan. Ákimdikter sý tasqyny saldarynan egis jumystaryn ýaqytynda bastaı almaıtyndardy nemese shyǵynǵa ushyraǵandardy jedel esepke alýy qajet», - dep málimdedi aýyl sharýashylyǵy vıtse-mınıstri Erbol Tasjúrekov.
Serik Jumanǵarın zardap shekken óńirlerdiń basshylaryn tyńdap, dúkender men saýda oryndarynyń jumysyn barynsha tez qalpyna keltirýge jáne azyq-túlik qorlaryn qajetti kólemde shekteýden shyǵarýǵa nazar aýdarý qajettigin basa aıtty. Sondaı-aq Premer-Mınıstrdiń orynbasary «Azyq-túlik korporatsııasy» AQ-ǵa óńirlerdi aýyl sharýashylyǵy janýarlary úshin azyqpen qamtamasyz etý máselelerin jyldam jáne bıýrokratııasyz pysyqtaýdy tapsyrdy.
