Turaqtandyrý qory: Aqtóbede úsh sharýanyń ónimine basymdyq berildi
AQTÓBE. KAZINFORM – Aqtóbe oblysynda Turaqtandyrý qorynyń aınalym qarjysy 1,9 mlrd teńgeniń qurap otyr. Bıyl kúzde de jergilikti taýar óndirýshilerden kókónis alynady.
Áleýmettik mańyzy bar azyq-túlik taýarlarynyń baǵasyn turaqtandyrý úshin qazirgi kezde sharýalarmen kelisim jasaldy. Jergilikti sharýalar kartop, sábiz, pııaz jáne qyryqqabat ósirip jatyr.
- Buǵan deıin 4300 tonna kartop, 1027 tonna sábiz, 835 tonna pııaz jáne 1100 tonna qyryqqabat jınaý úshin kelisimshart jasalǵan. Bári de úsh jergilikti sharýaǵa tıesili. Sondaı-aq, qyzylordalyq taýar óndirýshi «Naı-Mır» JShS-i jalpy somasy 136 mln teńgege 2023 jyldyń kúzgi óniminen 340 tonna kúrish jetkizedi. Al 55 000 lıtr kúnbaǵys maıyn jetkizýge 48,6 mln teńge qarjy aýdaryldy. Ár lıtri 445 tg dep esepteldi. Bul ónimder «Tabys» kommýnaldyq bazary men shaǵyn bazarlarǵa, «Anvar» jáne «Dına» saýda jelilerine shyǵarylady. Búgingi tańda 18 áleýmettik pavılon jumys isteıdi. Olar arqyly Turaqtandyrý qorynyń rezervinen ónimderge taýarlyq ınterventsııa júrgiziledi. Aınalym shemasy arqyly áleýmettik mańyzy bar azyq-túlik taýarlarynyń 9 túrine tómendetilgen baǵany belgileý boıynsha 5 kásipkerlik sýbektisine 0,1 paıyzben jalpy somasy 1 mlrd 926 mln teńge nesıe usynylyp, kelisimshart jasaldy, - dep habarlady «Aqtóbe» ÁKK-niń baspasóz qyzmeti.
Sonymen birge 2023-2024 jyldarǵa jasalǵan kelisimshart boıynsha 750 tonna sıyr etiniń súıekti jaýyryn, tós bóliginiń kelisi 1750 teńgeden jetkiziledi. Birinshi surypty unnyń 250, makaron ónimderiniń 150 tonnasy da alynady. Turaqtandyrý qoryna maılylyǵy 2,5 paıyz bolatyn jumsaq qaptamadaǵy pasterlengen sút, maılylyǵy 2,5 paıyz bolatyn jumsaq qaptamadaǵy aıran, maılylyǵy keminde 72,5 paıyzdy quraıtyn sary maı, maılylyǵy 5-9 paıyz bolatyn súzbe óndirýshilermen de kelisimshart jasaldy.
Aıta keteıik, qazir Turaqtandyrý qoryndaǵy kúrishtiń kelisi 420, al ósimdik maıynyń 1 lıtri 467 teńgeden satylyp jatyr.
Ózge áleýmettik taýarlar baǵa kóterilgen kezde shyǵarylady.
Eske salsaq, Pavlodar oblysy keıbir azyq-túliktiń arzandyǵy boıynsha elimizdegi bestikke kiredi.
