Turaqtaǵy kólikter trolleıbýstyń qozǵalysyna kedergi keltiredi - «Green Bus Almaty» JShS dırektory
ALMATY. QazAqparat - Almatyda trolleıbs kóliginiń nege jol ortasynda jıi qalyp kepteliske sebep bolatynyn «Green Bus Almaty» JShS dırektory Baýyrjan Kýlıshev túsindirdi, dep habarlaıdy QazAqparat tilshisi.
Almaty turǵyndary trolleıbýs kóligin tazalyǵy úshin jaqsy kóredi. Keı kezderi jolaýshylar dittegen jerine basqa kólikten góri tez jetedi.
Alaıda, elektr kóligi jolda qalyp qoıyp, keptelis týdyratyn jaǵdaı da jıi kezdesedi.
Kóbine jaryq óship qalady nemese shtangalar qatynas jelisinen shyǵyp ketedi.
Jaqynda ınternet paıdalanýshylary arasynda ájelerdiń trolleıbýs ıterip júrgeni týraly vıdeo qyzý talqylandy.
Elektr kóliginiń «yńǵaısyzdyǵy» týraly «Green Bus Almaty» dırektory aıtyp berdi.
«Shynymen de sońǵy ýaqytta qatynas jelilerinde úzilý jıi bolyp turady. Bul apat bolǵan jerde elektr jelisin óshirýge májbúrleıdi. Onyń sebebi kóp jylý jelilerinde jóndeý júredi. Joldar jóndelip jatqan soń barlyq derlik trolleıbýstardyń marshrýty ózgergen. Trolleıbýs jelileri kóshirilgen, qysqartylǵan. Bul ýaqytsha jeliler, sondyqtan jıi úziledi», - dedi Baýyrjan Kýlıshev.
Onyń aıtýynsha, onsyz da jelisi jetpeı kele jatqan trolleıbýstarǵa turaqtaǵy kólikter kedergi keltiredi.
Joldyń ortasynda turǵan kólikterdiń kesirinen trolleıbýstar uzaq ýaqyt shyǵa almaı turyp qalady.
«Sol jerge polıtsııa shaqyramyz. Biraq, sonda da altyndaı ýaqytym ketedi. Grafıkten qalyp qoıamyz», - dedi Kýlıshev.
«Green bus» JShS basshysy jóndeý jumystary bitken soń trolleıbýstardyń apatty toqtaýy tyıylatynyn aıtty.
Búgingi tańda trolleıbýs parkinde 212 kólik bar. 2016 jyldyń qarashasynda Almaty ákimi Baýyrjan Baıbek trolleıbýs jelilerin jóndeýge 5,5 mlrd teńge bólingenin aıtqan edi.
