Týr satyp alar kezde qandaı qujattardy tekserý qajet
ASTANA. KAZINFORM – Demalys kezinde azamattardyń qaýipsizdigi týrıstik qyzmetti rásimdeý barysynda zań talaptarynyń saqtalýyna tikeleı baılanysty. Osyǵan oraı Týrızm jáne sport mınıstrligi týr satyp alar kezde qandaı qujattardy tekserý qajettigin túsindirdi.
Vedomstvonyń naqtylaýynsha, týr satyp almas buryn týragentten týrdy satýdyń zańdylyǵyn jáne týrıstiń quqyqtyq qorǵalýyn rastaıtyn qujattar paketin suratyp, muqııat teksergen jón. Eń aldymen, týragent qyzmetiniń bastalǵany týraly habarlamanyń bar ekenine kóz jetkizý qajet.
Týragenttik kompanııa memlekettik elektrondy tizilimge engizilýi tıis. Bul onyń resmı túrde qyzmet kórsetetinin rastaıdy.
- Týrıstik qyzmet kórsetý týraly shartqa qol qoıý — sapardy rásimdeýdegi negizgi kezeńderdiń biri. Qujatta baratyn el men sapar merzimi, týrdyń tolyq quny, tólem tártibi, týrdan bas tartý talaptary, taraptardyń jaýapkershiligi, sondaı-aq qarajatty qaıtarý sharttary naqty kórsetilýi qajet, - dedi mınıstrlikten.
Qarjylyq qujattarǵa da erekshe nazar aýdarǵan jón. Tólem jasaǵannan keıin mindetti túrde fıskaldyq chek talap etińiz. Qarajatty menedjerlerdiń jeke shottaryna aýdarmaǵan durys, sebebi tek resmı tólem qujaty mámileniń jasalǵanyn dáleldeıdi.
- Brondaý rastalyp, týr tolyq tólengennen keıin týragent týrıstke saparǵa qajetti qujattar paketin usynýǵa mindetti. Onyń quramyna qonaq úı, tamaqtaný jáne transfer týraly málimetter kórsetilgen vaýcher, áýe bıletteri nemese marshrýttyq túbirtekter, saqtandyrý polısi jáne týrısterdiń quqyqtaryn mindetti kepildendirý júıesi aıasyndaǵy qorǵanysty rastaıtyn týrkod kiredi, - dep atap ótedi vedomstvodan.
Mınıstrlik tótenshe jaǵdaı týyndaǵan jaǵdaıda týrısterge Qazaqstan Respýblıkasy azamattarynyń shyǵý týrızmi salasyndaǵy quqyqtaryna kepildik berý júıesiniń «Týrıstik Qamqor» jedel jelisiniń myna nómirine dereý habarlasýdy usynady: +7 700 112 2 112.
Buǵan deıin Qazaqstan álemdik gastronomııalyq reıtıngter kartasyna engenin jazǵan edik.
