«Týr de Fransta» dopıngsiz 7 ret jeńiske jetý múmkin emes - Lens Armstrong
ASTANA. 18 qańtar. qazAqparat - Dopıngke qatysty daý-damaıǵa baılanysty «Týr de Frans» jeńimpazynyń 7 tıtýlynan aıyrylǵan amerıkandyq veloshabandoz Lens Armstrong telejúrgizýshi Opra Ýınfrıge bergen suhbatynda stımýlıatorlardy qoldanǵandyǵyn moıyndady.
«Týr de Fransta» dopıngsiz 7 ret jeńiske jetý múmkin emes», - dedi Lens Armstron dúısenbide jazylyp, efırde beısenbi kúni keshqurym kórsetilgen suhabatta, dep habarlady Bı-Bı-Sı.
Ótken jyldyń qazan aıynda AQSh-tyń Dopıngke qarsy agenttiginiń (USADA) baıandamasy jarııalanǵannan keıin Halyqaralyq velosıpedshiler odaǵy Lens Armstrongty sporttyń bul túrinen ómir boıyna alastatyp, 1998 jyldyń tamyzynan bastap ıelengen barlyq dárejelerinen aıyrdy.
Bul rette, 41 jastaǵy veloshabandoz ol «sport tarıhyndaǵy eń iri dopıng-baǵdarlamasyn» qurdy degen tujyrymdamamen kelispeıtinin aıtty. Onyń sózine qaraǵanda, bul baǵdarlama «aqyldy, biraq táýekelge qatysy joq konservatıvti boldy».
«Iá, men úshin jeńiske jetý mańyzdy boldy, biraq bizdiń baǵdarlama 1970 jáne 80 jyldardaǵy Shyǵys Germanııanyń dopıng-baǵdarlamasynan artyq boldy dep kesip aıtýǵa bolmaıdy», - dedi Lens Armstrong.
Armstrong 1999, 2000, 2001, 2002, 2003, 2004 jáne 2005 jyldarda álemniń áıgili velojarysy - «Týr de Franstyń» jeńimpazy boldy. 2005 jyly jeńiske jetken soń ol óziniń sporttyq mansabyn toqtatatynyn aıtty. Alaıda dopıngke qatysty daý-damaı paıda bolǵannan keıin 2008 jyly Armstrong velojarysqa qaıta oralý sheshimin qabyldady. Ol 2009 jáne 2010 jyldary «Týr de Franstyń» eki jarysyna qatysty.
2011 jyldyń aqpan aıynda Lens Armstrong máńgilikke sporttan ketetini jóninde málim etti.
