«Týr de Frans» kópkúndiginiń 18-kezeńin Endı Shlek jeńdi, Iglınskıı márege 11-shi keldi
ASTANA. 22 shilde. QazAqparat /Jasulan Amanbaıuly/ - Keshe «Týr de Frans» velokópkúndiginiń 18-kezeńinde Lıýksembýrg sportshysy Endı Shlek kómbege birinshi bolyp keldi.
Ol óziniń aǵasy Frenk Shlekten jáne «BMC Racing Team» komandasynyń kóshbasshysy Kedal Evanstan eki mınýtqa ozyp ketti.
Qazaqstandyq klýb «Astana» sapynan eń úzdik nátıjeni Maksım Iglınskıı kórsetti. Ol jarysta pelotonnan oq boıy ozyp, kezeń boıy alda jumys jasap otyrdy. Degenmen kómbe taıap qalǵanda Endı Shlek ushqyrlyq tanytyp, Maksımdi ozyp ketti. Keıin pelotonnyń aldy «Astana» veloshabandozyn keıinge shegerip tastady. Maksım márege 11-shi keldi.
Kópkúndiktiń jalpy esebinde áli kúnge deıin «Team Europcar» klýbynyń veloshabandozy Tomas Vokler kósh bastaýda.
Keshegi jeńisinen keıin Endı Shlek jalpy eseptegi ýaqytyn jaqsartyp, sary jeıdeniń ıegeri T. Voklerden 15 sekýndqa ǵana qalys qalyp otyr. «Astanalyqtardyń» qatarynda eń jaqsy nátıjege qol jetkizgen Andreı Zeıts 38-orynda, ol kóshbasshydan 1saǵatqa jýyq ýaqyt qalyp keledi.
