«Týr de Frans»: «Astana» velokomandasynyń kóshbasshysy negizgi qarsylastaryn shań qaptyrdy
ASTANA. QazAqparat - «Týr de Frans» kópkúndiginiń 5-kezeńinde jarystyń kósh basynda kele jatqan «Astana» velokomandasynyń kapıtany Vınchentso Nıbalı negizgi qarsylastarynan qara úzip, márege úshinshi keldi.
Osylaısha, ol Týr de Franstyń sary jeıdesin ózinde saqtap qaldy. Belgııanyń Ipr men Arenberg qalalary arasynda ótken 155,5 shaqyrymdyq joldy birinshi bolyp gollandııalyq veloshabandoz Lars Bom júrip ótti. Ekinshi orynda «Astana» komandasynyń sportshysy Fýlsang keldi.
Aıta keteıik, osy kezeńde Týr de Frans kópkúndiginiń byltyrǵy jeńimpazy Krıstofer Frým jaraqat alyp, jarys jolynan shyǵyp qaldy. Sonymen qatar negizgi qarsylas Alberto Kontador bul jarys kúninde Astana kapıtanynan 2:55 mınýtqa qalyp qoıdy.
Jalpy esepte Vınchentso Nıbalı kósh bastaýda, ekinshi orynǵa odan eki sekýndqa qalyp kele jatqan «Astana» komandasynyń taǵy bir múshesi ıAkob Fýlsang jaıǵasty. Úzdikter úshtigin Peter Sagan túıindep tur. Ol kóshbasshydan 44 sekýndqa qalyp keledi.
