Týr de Frans-2016: «Astana» velokomandasynyń sportshysy márege úshinshi keldi
ASTANA. QazAqparat - Salanshes pen Medjeve arasyn jalǵaǵan Týr de Frans kópkúndiginiń 18-shi kezeńi taýly jeke esep synymen jalǵasty.
Jalpy qashyqtyǵy 17 shaqyrymǵa sozylǵan kezeń nátıjesinde «Astana» velokomandasynyń kapıtany Fabıo Arý Rıchı Portpen bir nátıje kórsetip úshinshi oryn ıelendi.
Jeńimpaz jeıdesine ıelik etken «SKY» komandasynyń ókili Krıstofer Frým berilgen qashyqtyqty 30:43 kórsetkishimen júrip ótip, kezeń jeńimpazy atandy. Fabıo Arý odan 33 sekýnd artta qaldy. Ekinshi nátıje «Giant-Alpecin» shabandozy Tom Dıýmýlınniń enshisinde. Kezeń qorytyndysymen «Astana» kapıtany jalpy esepte segizinshiden jetinshi orynǵa kóterildi.
18-shi kezeń nátıjesi:
1 FROOME, Christopher (SKY) 30:43
2 DUMOULIN, Tom (TGA) + 21
3 ARU, Fabio (AST) + 33
15 NIBALI, Vincenzo (AST) + 1:23
24 LUTSENKO, Alexey (AST) + 2:12
36 ROSA, Diego (AST)
39 FUGLSANG, Jakob (AST) + 2:37.
«Astana» komandasynyń sporttyq menedjeri Dmıtrıı Fofonov aldaǵy eki taýly kezeńde Fabıo Arýdyń jalpy esepte úzdik úshtiktiń qatarynan kórinýge áli de úmit bar ekenin aıtty.
«Fabıo Arýdyń jeke esep kezeńin jaqsy nátıjemen aıaqtaıtyndyǵyna senimdi boldyq. Alǵashqy Týr de Fransyna qatysyp jatqan oǵan úzdik nátıjege qol jetkizý óte mańyzdy. Odan bólek, Arý kópkúndiktiń úshinshi aptasyna qaraı naǵyz babyna keledi. Sondyqtan aldaǵy eki taýly kezeńde qarsylastarmen aradaǵy ýaqyt aıyrmashylyǵyn qysqartýǵa múmkindik bar»,- dedi Fofonov.
Jalpy esep nátıjesi:
1 FROOME, Christopher (SKY) 77:55:53
2 MOLLEMA, Bauke (TFS) + 3:52
3 YATES, Adam (OBE) + 4:16
4 QUINTANA ROJAS, Nairo (MOV) + 4:37
5 BARDET, Romain (ALM) + 4:57
6 PORTE, Richie (BMC) + 5:00
7 ARU, Fabio (AST) + 6:08.
Búgin veloshabandozdar birinshi sanatqa jatqyzylǵan eki taýdy baǵyndyrady. Máre núktesi teńiz deńgeıinen 1372 km bıiktikte ornalasqan. Jarystyń jalpy qashyqtyǵy - 146 shaqyrym.
