«Týr Almaty» halyqaralyq velojarysy: Qandaı kósheler jabylady
ALMATY. QazAqparat - Almatyda ótetin «Týr Almaty-2018» halyqaralyq kásibı velojarysy barysynda birqatar kósheler jabylady, dep habarlaıdy QazAqparat tilshisi.
Ońtústik Astanada 29-30 qyrkúıek aralyǵynda ótetin jarys Ortalyq Azııadaǵy iri sporttyq dodalardyń biri bolyp tabylady.
Jarystyń tikeleı translıatsııasyn «Eurosport» telearnasy arqyly 60-tan astam el tamashalaıdy.
Uıymdastyrýshylardyń aıtýynsha, bıylǵy jarysta da kóshelerdegi jol qozǵalysy tek veloshabandozdar ótken kezde ǵana jabylatyn bolady. Sportshylar toby ótip ketken soń jol qozǵalysy qaıta jandanady.
29 qyrkúıek (birinshi kezeń)
Saǵat 10:00-de «Týr Almaty» jarysynyń qatysýshy komandalary tanystyrylady. Sol sebepti «Astana» alańynda jol qozǵalysy 9:30-dan bastap jabyq bolady.
Jarys saǵat 12:00 shamasynda «Astana» alańynan bastaý alady. Bul kezeń barysynda sportshylar 26,1 shaqyrymnan 7 sheńber jasaýy tıis bolady. Baǵyty: «Astana» alańynan bastap Tóle bı kóshesimen Dostyq kóshesine deıin; Dostyq kóshesimen Sátbaev kóshesine deıin; odan ári Nazarbaev dańǵylyna deıin.
Osy baǵytpen sportshylar Mustafın kóshesine deıin jarysady. Qaıta aınalyp Seıfýllın kóshesine keledi.
Odan ári Sátbaev-Baızaqov-Abaı-Jeltoqsan-Tólebı kóshesimen júrip ótedi.
Sóıtip «Astana» alańynda márege jetedi.
Jarystyń alǵashqy kezeńi Astana ýaqytymen shamamen 16:00-de aıaqtalady. Sol sebepti, 9:30 ben 16:00 aralyǵynda atalǵan kósheler ýaqytsha jabylyp otyrady.
30 qyrkúıek (ekinshi kezeń)
Ekinshi kezeń 11:00-de «Halyq Arena» muz saraıynan bastalady. Sportshylar toby «Shyǵys aınalma joly-ál-Farabı kóshesi» baǵytymen 4,5 sheńber jasaýy tıis.
Bul kezeń Tuńǵysh Prezıdent parki-Dostyq kóshesi-Medeý shatqaly marshrýtymen aıaqtalatyny josparlanǵan.
Atalǵan jol ýchaskesinde saǵat shamamen 11:00-16:00 aralyǵynda qozǵalys kezeń-kezeńimen shekteledi.
«Qurmetti Almaty turǵyndary, ýaqytsha qolaısyzdyqtar úshin keshirim suraımyz. Bizdiń maqsatymyz - jarysty tamashalaýdan bas tartyp otyrǵan jolaýshylarǵa keltiriletin dıskomfortty barynsha azaıtý. Jarysta 15 eldiń komandasy baq synaıtyn bolady. Qoly bos, sportqa jany qumar adamdar bolsa, qazaqstandyq komanda úshin jankúıer bolýlaryńyzdy suraımyz», - deıdi uıymdastyrýshylar.
Aıta keteıńk, tańǵy 10:00-12:00 aralyǵynda Qurmanǵazy men Dostyq kósheleriniń qıylysynan tegin avtobýstar qatynaıtyn bolady.
