«Týr Almaty-2017» velojarysy bastaldy
ALMATY. QazAqparat - «Týr Almaty-2017» kásibı velojarysy osymen Almatyda 5-ret ótkizilip otyr, dep habarlaıdy QazAqparat tilshisi.
Dúbirli dodada 17 elden 20 komanda baq synap jatyr.
«Týr Almaty-2017 qalada 5-ret ótip jatyr. Bul jarystyń jańa formaty eldegi velosporttyń edáýir damyǵanyn kórsetip otyr. Ótken jyly jarys kópkúndik bolady dep edik. Aıtqanymyzdaı bıyl UCI halyqaralyq velosıpedshiler odaǵy maquldap, eki kúndik jarysty ashtyq. «Týr Almaty-2017» kópkúndigi aldyndaǵy jarystardyń barlyǵynyń jaqsy nátıjesin kórsetse kerek», - dedi Qazaqstan velosıped sporty federatsııasynyń vıtse-prezıdenti Amanbek Kýlchıkov.
Onyń aıtýynsha, bıyl Almaty týryna qatysýǵa ótinish bildirgen komandalardyń sany óte kóp. Uıymdastyrýshylar tegeýirini myqty «Astana» komandasyna tótep bere alatyn kil myqtylardy iriktep aldy.
Týrdyń ereksheligi - bul kóp kúndik velojarys mártebesinde alǵash ret ótkiziletin bolady. Jarys eki kezeńnen turady. Sonymen qatar, jarystyń eki kúndik formaty sportshylarǵa Azııa chempıonatynda jáne Olımpıada oıyndarynda odan ári biliktiligin alý úshin kóp upaı jınaýǵa múmkindik beredi.
Baıqaýdyń baǵyty taýdyń betki jaǵynda ornalasady: «Almaty týry» birinshi kezeńi QBTÝ ǵımaratynyń janynda bastalady, qatysýshylar Tóle bı, Fýrmanov, Sátpaev, Baızaqov, Abaı jáne Jeltoqsan kósheleriniń boıynda «qala sheńberin» aınalady. Birinshi kezeńniń aıaqtalýy Almaty arenasynyń aýmaǵynda ornalasady. Erteń jarystyń ekinshi kezeńi bastalady.
