«Týr Almaty-2017»: Alekseı Lýtsenko birinshi kezeńinde jeńiske jetti
ALMATY. KAZINFORM - Almatyda ótip jatqan kópkúndik «Týr Almaty-2017» jarysynyń alǵashqy kezeńi máresine jetti, dep habarlaıdy QazAqparat tilshisi.
Alǵashqy kezeńde qazaqstandyq Alekseı Lýtsenko 3 saǵat 49 mınýt 51 sekýnd ýaqytpen alǵashqy bolyp máre syzyǵyn kesti.
Ekinshi orynda frantsýz Remı Dı Gregorıo Lýtsenkodan 19 sekýndqa keshigip jetti. Úshinshi orynǵa ırandyq sportshy Mırsamad Pýrseıedıgolahýr (+21 sekýnd) taban tiredi.
Jarystyń alǵashqy kezeńinde veloshabandozdar Tóle bı, Fýrmanov, Satpaev, Abaı, Shyǵys Aınalma Joly, Ál-Farabı, Saın, Momyshuly, Rysqulov, Aqyn Sara kóshelerimen 172,1 shaqyrym júrip ótip, «Almaty Arenasynda» jarysty aıaqtady.
1 sheńberden soń 5 sportshy toptan ajyrap qalyp, dıstantsııadan qalyp qoıdy.
Qalanyń ortalyǵyndaǵy aınalymdardan soń 9 sportshy ózgelerden qara úze bastady.
Olardyń ishinde 3 shabandoz «Astana» velokomandasynyń músheleri - Danıl Fomınyh, Dmıtrıı Grýzdev pen Bahtııar Kojataev.
Alaıda ekinshi aınalymda negizgi topta ýkraınalyq «Gols», Mınsk Veloklýby, Latvııa ulttyq quramasy qashyqtyqty jaqyndata tústi.
Márege 80 shaqyrymdaı qalǵanda negizgi toptan Alekseı Lýtsenko bastaǵan birneshe shabandoz ajyraı bastady.
40 shaqyrymdaı qalǵanda top jarǵandardyń arasynda Lýtsenko men 3 qazaqstandyq sportshy, 4 sheteldik sporty boldy.
20 shaqyrym qalǵanda kóshbasshy topta 5 sportshy qaldy.
17,7 shaqyrym qalǵanda A.Lýtsenko ózgelerden qashyqtyqty uzata bastady. Osylaısha ol máre syzyǵyn birinshi bolyp kesti.
Úzdik bestikke sondaı-aq, qazaqstandyq Baqtııar Qojataev, ıtalıandyq Alberto Chekkın kirdi.
Jarystaǵy negizgi top Lýtsenkodan soń 1 mınýt kóleminde jetti.
Velojarystyń ekinshi kezeńi erteń «Halyq Arena» ǵımaratynda bastalady jáne «ShAJ-Ál-Farabı» marshrýtymen Tuńǵysh Prezıdenttiń saıabaǵynan «Medeý» taý shańǵysy kýrortyna deıin jalǵasady.
