Túpnusqasy qazaqsha jazylatyn zańdardyń sany qashan artady – Ádilet mınıstriniń jaýaby

ASTANA. KAZINFORM – Ádilet mınıstri Erlan Sársembaev Úkimet otyrysynan keıin ótken baspasóz máslıhatynda zańdardyń túpnusqasy nege qazaqsha jazylmaı jatqany týraly pikir bildirdi. 

— Eger qajettilik týyndap jatsa, qaı tilde kóbinese suraý bolady, sol tilde zań jobasy ázirlenedi. Ol baǵytta qandaı da bir qıyndyqtar bolyp jatqanyn kórgen emespin. Qazir ondaı múmkindik bar. Qajettiligi bar bolsa, qaı tilde azamat erekshe sóıleıdi, sol tilde zań jobasy ázirlenedi, - dedi ol.

Mınıstr Konstıtýtsııada zań jobasy Ádilet mınıstrliginiń saraptamasyna eki tilde bir ýaqytta túsý kerektigi aıtylǵanyn eske saldy. 

— Sondyqtan, bizge kelip jatqan zań jobalary eki tilde ázirlenedi. Saraptama jasaǵan kezde azamat qaı tilde erkin sóıleıdi, sol tilde saraptamany júrgizemiz. Osyndaı talap qoıamyz degen oıda joq. Qaı tilde ázirlenedi, sol tilde qoldana beredi. Eshqandaı problema joq, - dedi ol. 

Aıta ketý kerek, Premer-mınıstr Oljas Bektenov búgin Úkimet otyrysynda memlekettik apparattaǵy artyq adamdardy tsıfrlandyrý arqyly qysqartý kerektigin málim etti.